Home » Talentonan riba scenario, den abogacia y futbol ta di acuerdo: Hoben y Talentoso ta bon iniciativa cu mester continua

Talentonan riba scenario, den abogacia y futbol ta di acuerdo: Hoben y Talentoso ta bon iniciativa cu mester continua

by sxm
0 comment 53 views

ORANJESTAD – Arte, deporte y carera profesional no por ta rumbonan di bida mas diferente di otro; sinembargo Anaïsa, Abilene y Aaliyah ta tres hende muhe cu, na un edad hoben, ya ta destaca den nan tereno. Esaki a pone cu comision di Hoben y Talentoso a scoge pa reconoce nan den edicion di prome lustro. Esaki no ta e unico similaridad entre nan. Tur tres ta kere cu e iniciativa di Prome Minister Mike Eman pa reconoce e talentonan hoben di nos pais, ta algo masha positivo y cu merece continua.

Pa Anaïsa tabata un momento super special y di hopi emocion, ora cu el a haya sa cu e ta nomina pa Hoben y Talentoso. “E tabata un sorpresa pa mi y mi a keda super super contento,” el a bisa indicando cu e reconocemento ta treciendo cune diferente oportunidadnan nobo. Pa Orman e proyecto ta reconoce un persona su potencial personal, pero tambe den con e ta motiva of inspira otro den comunidad. “Mi ta haya cu nan mester sigui cune paso na Aruba mi ta wak hopi hende cu hopi talento; hopi hoben cu ta haciendo cosnan hopi grandi den comunidad. E ta un manera pa stimula e hobennan pa haci loke nan ta gusta haci,” e hoben a declara.

Abilene Croes Thijsen, a bira merecedor di e reconocemento pa su estudio y desempeño profesional den e sector di ley y abogacia. E ta wak su nominacion como un honor y ademas un estimulo. “Sigur e ta un estimulo y un reconocemento pa e trabou grandi cu bo ta haci cu bo estudio y pa yega bo metanan. Mi ta spera cu e ta un ehempel pa otronan; cu si bo traha duro bo ta logra bo metanan,” e hoben a bisa. E ta considera Hoben y Talentoso como un bon iniciativa.

E hoben futbolista Aaliyah Marie Simon ta comparti e sentimento aki. P’e tambe e nominacion ta un motibo grandi di orguyo. Apesar di su edad  hoben, e no ta sinti’e incomodo cu e responsabilidad cu e tin awo como ehempel pa otro hobennan. E ta considera cu Prome Minister Mike Eman a haci algo hopi importante pa tur esnan cu ta selecta. “Mi ta haya hopi great paso awendia hopi hende mester wordo reconoci pa nan talentonan,” asina e hoben futbolista.

Diadomingo anochi un total di 32 hoben a ricibi un plakkaat di reconocemento pa a destaca den tereno di  deporte, educacion, innovacion, musica, como empresario, den arte y tambe pa e proyecto di Formacion Social, cual tambe, mescos cu Hoben y Talentoso, ta un iniciativa di Gabinete Mike Eman.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio