ORANJESTAD.- “Aruba ta cla pa un revolucion economico”. Esaki na opinion di lider di POR, Otmar Oduber, elaborando riba plannan di su partido pa den e proximo periodo di gobernacion, bini cu un maneho fiscal-economico cu ta stimula creacion di un fondo di inversion, cu lo brinda e infrastructura necesario cu e meta pa desaroya un sector economico nobo y revolucionario. Revolucionario como cu ta trata aki di desaroyo di un sector economico cu interaccion intenso di cultura, creatividad, economia y tecnologia, cual potencialmente por crea miles di cupo di trabou di calidad halto y pues cu un bon salario, specialmente pa e generacion conoci como ‘millennials’, pero tambe pa otronan cu kier haci carera den ramo di tecnologia y innovacion.
Segun Otmar Oduber, San Nicolas mester ta e sitio predilecto na Aruba pa sirbi como incubador pa e revolucion economico aki. San Nicolas, pa hopi aña tabata e motor di desaroyo economico di Aruba. Lamentablemente pa hopi tempo caba e area aki no a haya e atencion, respet y oportunidad pa participa den e adelanto cu otro districtonan di nos isla si a conoce. POR ta reconoce y ta enfoca riba e gran potencial relaciona cu tur loke San Nicolas tin pa ofrece y e posiblidadnan grandi pa e sigui riba e caminda pa bira no solamente e capital di herencia cultural di Aruba, pero tambe e ‘silicon valley’ nobo di e area di Caribe y Latino America.
E revolucion economico proponi pa POR, no solamente ta nifica desaroyo di un sector economico nobo y creativo, pero tambe e habilidad pa crea y circula capital intelectual cu e potencial pa genera entrada, cupo di trabou y entrada cu exportacion di conocemento. Na mes momento, e revolucion economico aki lo promove inclusion social, diversidad cultural y desaroyo di e ser humano.
Pa POR logra diversificacion economico y crea un pilar economico nobo y sostenibel, basa riba creatividad y tecnologia, lo introduci tambe incentivonan fiscal atractivo pa atrae inversionistanan local y internacional. Den e segundo mita di añanan 80 e formula aki a wordo uza cu exito pa stimula creacion di nos industria di turismo, cu awe ta e pilar economico principal di nos pais. “Y nos no tin duda cu e biaha aki atrobe nos pais ta bay ta exitoso y cu hunto nos lo crea un economia revolucionario cu lo beneficia henter nos comunidad”, Otmar Oduber a termina bisando.