Home » PENSAMENTO, VISION, MISION Y COMPROMISO PA NOS CULTURA 2017 – 2021 Contribucion di Edjean Semeleer di Partido POR

PENSAMENTO, VISION, MISION Y COMPROMISO PA NOS CULTURA 2017 – 2021 Contribucion di Edjean Semeleer di Partido POR

by sxm
0 comment 57 views

Cultura ta algo bibo y vibrante cu conoce un desaroyo constante y no ta solamente nos musica of nos celebracionnan durante henter aña manera por ehempel Dia di Betico, Carnaval, 18 di Maart, Dera Gai of nos tradicion musical di fin di aña.

 

Cultura di un pueblo ta mucho mas profundo cu esey.  E ta un conhunto di varios aspecto. E ta nos forma di biba, nos forma di pensa y expresa, nos tradicion y custumbernan como pueblo, nos forma di anda cu otro, nos forma di bisti, nos forma di comunica cu otro. Cu otro palabra e ta tur loke ta caracteristico di nos como un pueblo den su totalidad.

Dicon hopi bes Cultura no ta wordo considera como importante?
Un di e tanto motibonan ta, pasobra hopi bes nos gobernantenan ta djis wak e como un expresion of un gasto pa gobierno.
Hopi no ta compronde su importancia y masha poco ta consciente di su efecto, specialmente door cu nunca tabata interesa pa wordo exponi na expresionnan creativo y artistico cu tambe ta yuda fomenta un sentido di orguyo pa nos cultura y nos Pais.
Esey ta un indicacion di con importante “arte” y “aprecio pa arte” ta den nos educacion. Ta un lastima cu actualmente ainda e no tin un lugar prominente den nos skolnan.

Banda di deporte, nos muchanan y nos hobennan mester wordo exponi desde un edad hopi hoben na arte.  E beneficionan ta fantastico y numeroso. E ta proba cu esaki ta impacta e ser humano di un forma sumamente positivo. Esaki tambe ta yuda educa y forma ciudadadonan ehemplar y util pa nos sociedad.
Personanan inspira, discipliná, cu habilidad social, tolerante y cu determinacion pa yega leeuw den bida.

 

Nos ta papia cu Aruba mester “mantene su identidad bibo”. Nos ta para keto y pensa con nos por logra esey? Nos no mester djis keda papia di futuro y inovacion. Ta berdad cu nos mester reconoce y balora e aporte tambe di nos hendenan, specialmente nos hobennan, pa enrikese nos identidad y hiba nos cultura y folklore den e proximo era. Pero nos mester ta consciente tambe di unda nos ta bin. Nos mester ta realmente orguyoso di nos raiznan y di nos herencia cultural. Reconoce e balor y importancia di nos pasado y nos presente. Solamente asina nos por sigui inova y evoluciona.

 

Nos artistanan ta hunga un rol sumamente importante den esaki.
Nos artistanan ta e alma creativo di nos pueblo.
Nos artistanan por influencia y inspira gruponan grandi di ser humano y expone nan na excelencia.
Nos artistanan ta esnan cu por yuda mantene nos autenticidad bibo y eynan mi ta convenci cu tin hopi oportunidad cu nos artistanan por beneficia tambe di dje, haciendo e trabao noble y importante aki. Cu “artista” no ta solamente wordo referi na e artista di tarima of plastico, pero artistanan di arte practico, cu ta e artista culinario cu tambe nos mester salvaguardia.

 

Reconoce, apoya y respeta nos artistanan y nan rol ta hopi importante, pero tambe crea espacio y plataforma pa nan por sigui desaroya nan habilidadnan y expone nan mes y nan talento. Esaki lo no djis enrikese nos herencia, pero lo haci di Aruba tambe un destinacion hopi mas atractivo pa nos bishitantenan.

Nos kier sigui depende riba turismo como e pilar di mas importante di nos economia y ingreso di nos pais? Nos mester por sa con pa diferencia nos mes for di tur otro destinacion den nos region y totalmente resalta y sali beneficia den esaki. No solamente nos naturaleza y e amabilidad y cordialidad di nos hendenan ta sumamente importante, pero KIKO ta haci Aruba, e isla autentico den Caribe. 

 

Nos por fomenta autenticidad door di duna hopi mas atencion na nos cultura y nos identidad. Y ta ey ta unda cu mi coleganan artista nan rol ta sumamente importante. Nos no mester limita nos mes. 

Imagina cu e revolucion economico cu partido POR ta propone den su programa di gobernacion “Vision 17-21”, lo haci cu bo trabao diario ta bira parti di e autenticidad cu nos isla mester representa pa atrae turismo di calidad. Un turista di “Calidad”, ta busca semper un destinacion exotico pa su vacacion.  E kier experencia autenticidad. E kier sumergi su mes totalmente den e cultura di e destinacion y e ta semper dispuesto pa gasta y paga mas, basta e por tin un vacacion y experiencia autentico.
Aki ta nos oportunidad pa usa nos rikesa cultural y nos propio artistanan como recurso pa eleva nos entrada conhuntamente cu nos turismo.
Enfocando no solamente riba San Nicolas cu mester bira nos “Cultural & Heritage City”, pero tambe riba centronan di bario y monumentonan rond di nos isla.  Crea eventonan y proyectonan cultural semanal unda cu nos centronan di bario lo por ta mas activo y tambe por genera suficiente entrada pa asina no tur ora mester depende di subsidio di Gobierno cada bes. Nan tambe mester bira sostenibel y/o independiente.

Esaki sigur lo crea un sentido di orguyo y participacion den nos comunidad caminda nos hendenan mes lo ta contribuyendo na e bienestar di nos cultura den su diferente aspectonan.
Mas cu claro, nos lo no keda limita te aki solamente pa nos cultura y turismo, pero tambe nos lo keda enfoca entre otro na restauracion y mantencion di e poco monumentonan cu por wordo rescata ainda. Nos lo percura tambe pa conservacion, documentacion y digitalisacion di informacion cultural tanto di nos herencia tangibel como tambe nos tradicion y custumbernan

Unabes cu esakinan wordo realisa, nos lo keda avansa y bira e TOP DESTINACION den Caribe y e isla orguyoso di su adelanto cultural constante y genuino.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio