Home » Minister Paul Croes deteni awe, relato oficial di Ministerio Publico

Minister Paul Croes deteni awe, relato oficial di Ministerio Publico

by sxm
0 comment 57 views

Bao guia di Ministerio Publico, Landsrecherche (LR) y Cuerpo Policial di Aruba ta haciendo basta tempo caba investigacion di posible casonan di ambtelijke omkoping. E investigacion aki tin e nomber di “Ibis”.

E sospecho ta cu e ambtelijke corruptie ta encera primordialmente cu e minister di labor anterior tabata pidi y/of tuma placa di soborno en cambio di un exencion (ontheffing) di e toets di arbeidsmarkt.
Un arbeidsmarkttoets positivo di parti di DPL (Departamento di Progreso Laboral) of un ontheffing di esaki ta un condicion pa DIMAS saca un permiso di trabao na Aruba.
E ontheffingnan tabata wordo saca dor di e minister, den mayoria di e casonan, despues cu DPL a duna conseho negativo.
Cu e ontheffing aki, stranheronan tabata por a haya permiso di trabao.

Durante e investigacion a lanta ademas e sospecho cu e minister a haci su mes entre otro, culpable na labamento di placa, ambtsmisbruik y pone hende na trabao ilegalmente.

Awemainta dos persona a keda deteni, entre nan, e ex-minister di labor.
E sospechosonan aki lo wordo poni den detencion.
Banda di esey, a topa cu un muher stranhero cu a wordo entrega na Warda Nos Costa.
Lo wordo investiga si e señora aki ta ilegalmente na Aruba, of si e mag di traha of si el a traha pa e minister.

Desde 28 di maart 2017 un total di 30 testigo y 21 sospechoso a wordo scucha.
Ocho di e sospechonan ey a wordo deteni pa interogacion.
Di e ochonan aki, tres ta ainda den detencion.
E sospechosonan cu ta den libertad, ta sigui como sospechoso den e investigacion.
E decision tocante cua di e sospechosonan aki lo wordo persigui, lo wordo tuma door di Ministerio Publico na momento cu e investigacion ta cla.

Banda di scucha testigonan y sospechosonan, e ekipo investigativo a traha e ultimo lunanan cu analiza e material cu a wordo tuma den beslag te awor.
Particularmente e inventarisacion di cosnan digital cu a wordo tuma den beslag (informacion riba computers y por ehempel, telefonnan) ta costa hopi trabao.

Awe den cuadro di e investigacion a listra den tres lugar (un cas y dos lugar comercial) bao guia di e huez-comisario encarga cu casonan penal.
Funcionarionan di LR, RST y Polis tabata envolvi den esakinan.
A tuma administracion y portadornan di informacion digital den beslag.

E sospechosonan deteni awe a wordo poni den beperking.
Esey kier meen cu nan no mag di tin contacto cu ningun hende, aunke si cu nan abogado.
Banda di esey tin un ordo contra e minister cu e no mag di haya stukken.
E minister lo wordo confronta durante e interogacionnan cu e resultadonan di e investigacion.
Pa e motibo ey, Ministerio Publico lo ta hopi reserva ora di duna informacion tocante e investigacion.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio