ORANJESTAD – Durante un ceremonia na Santana Catolico na Playa, Fundacion Watty Vos a recorda e di 80 aniversario di e fayecido politico. Ademas di famia y miembronan di e fundacion, tambe tabata presente Prome Minister Mike Eman y Minister Benny Sevinger. E ceremonia a encera discurso di Edu Vos, di e fundacion di Mike Eman, como lider di AVP y Prome Minister di pais Aruba.
Na final di e ceremonia Porois Tromp, Mike Eman, Benny Sevinger y Richard Winston Haynes a pone krans den nomber di e Fundacion y Jo-Anne Thiel hunto cu e muchanan Isabella Malia Vos y Edelynne Annabella Marie Vos a pone un krans den nomber di famia Vos.
Robert Candelaria, a conta su experencia den pasado cu Watty Vos, kende ta esun cu a encurashe pa na final di su estudio bolbe Aruba y duna su aporte na Cuerpo Policial. E fayecido politico tabata Minister tempo cu e tata di Candelaria tabata traha den Cuerpo Policial. El a expresa su agradecimento na tur loke Vos a haci pa su persona.
Edu Vos, sobrino di Watty Vos y miembro di e fundacion, tambe tabatin masha bon recuerdo di e politico di Rancho (Playa Pabou). Un persona cu den diferente etapa di su bida a duna lo miho di dje como deportista, musico, sindicalista y politico na e comunidad di Aruba. “Durante e etapa aki di su bida, e nomber Watty Vos a nace. E tabata un persona di tur hende y bo por a combersa cune pa oranan largo, sin cu esaki ta bira laf, y semper por siña algo di e combersacionnan aki,” Edu Vos, sobrino y miembro di e Fundacion Watty Vos, a expresa. El a agrega cu ora Watty Vos tabata traha e tabata haci esaki cu corahe, determinacion y pasion pa cual den añanan ’70 el a convence politiconan di Reino cu Aruba ta cla pa produci su mesun polisnan riba suela Arubano. Asina cu riba 16 di augustus, 1975 Scol di Polis a keda inaugura. Despues di Status Aparte el a bira e prome Minister di Husticia y semper a percura pa tur aña tin un klas di polis. “Ban laga e lesnan di Watty Vos ta un fuente di inspiracion pa politiconan cu ta cuminsa awo,” Edu Vos a bisa.
Prome Minister Mike Eman tambe a recorda Watty Vos como un gran politico y cu a duna les di politica na tur esnan cu tabata rond di dje. E fecha 16 di augustus ta un momento pa recorda un personahe cu a nifica asina hopi pa Aruba y AVP. Un personahe cu a pone metanan grandi su dilanti, cu a parce inalcansabel, pero a logra realisa. “Watty a demostra cu ora bo ta traha pa un comunidad, ora bo ta pone bo curason den un trabou, finalmente bo ta logra. Pa nos hoben cu por a cana cerca di dje den añanan importante di historia di Aruba, nos por a siña hopi di e politiconan importante di e tempo ey. Cerca Watty semper tabatin un les adicional cu no tin nada di haber cu politica pero cu ser humano. Algo cu semper a inspirami y a siñami hopi di bida ta e forma con Watty tabata trata tur hende, e stimacion pa para keda rato y duna atencion na cada ciudadano ta algo unico di Watty Vos,” Eman a conta.
El a finalisa bisando cu semper mester ta agradecido na Watty Vos pasobra su lesnan di bida a sirbi tempo cu e tabata na bida pero tambe awendia con pa atende cu cierto situacionnan. “El a laga nos tambe cu marconan di referencia hopi importante y esey ta haci un lider grandi.”