Durante e ultimo lunanan e campaña politico pa e eleccion di 22 di September 2017 a haya e mesun dimension cu e campaña anterior di 2013, caminda un y tur por mira con Gabinete Eman a bolbe cuminsa uza fondonan y henter e aparato di gobierno pa nan meta politico, esta di trata di cumpra e consenshi di e pueblo Arubano.
Patronahe politico
Den un forma hamas bisto e gobierno aki a cuminsa spart cu contractnan di trabao di 3 te 6 luna, coordinadornan cu AVP-diploma a bira ambtenaar, tambe diripiente despues di 8 aña tur promocion di ambtenaarnan a bira posibel, contractantnan a haya trabao bon paga di 27 mil florin pa luna pa haci propaganda pa AVP riba facebook, partimento di asfalt, klinkers y luz di caya diripiente a bira posibel pa henter Aruba etc. Tur e patronahe politico aki ta wordo haci, mientras cu no tin e fondonan aloca den e presupuesto di 2017. Pero Mike Eman y su ministernan no ta ni preocupa, ya cu nan adagio ta “wie dan leeft, wie dan zorgt”. Pues laga e gobierno proximo busca un solucion pa e bagamunderianan aki. Den e forma iresponsabel di pensa di partido AVP esaki por ser logra solamente por medio di un presupuesto supletorio , cu lo mester ser trata promer cu fin di aña.
Presupuesto supletorio 2013
Sin duda algun cu tur e fechorianan aki cu placa di pueblo tambe a ser haci durante henter e campaña pa eleccion 2013 y tabata hustamente e gobierno di AVP aki mes cu a gana e eleccion mester a sinta riba nan blaar y a busca e solucion facilmente door di entrega un presupuesto supletorio na Parlamento di Aruba. Despues cu e presupuesto aki a ser aproba door di e 13 marionetanan den Parlamento, Algemene Rekenkamer a presenta e Cuentanan Anual (Jaarrekening) 2013 y aki por mira den nan rapport cu den total un suma di 64.4 miyon florin a ser surpasa (“overschrijding”) den presupuesto 2013 y esaki den e diferente ministerionan.
Abuso di fondonan publico
Esaki un biaha mas ta un muestra palpabel cu AVP ta un partido sin escrupulo y sin gevoel, ya cu nan ta campaña cu placa di pueblo y cu no ta importa nan cu e ladronicia aki lo haci e buraco financiero di nos pais mas grandi, basta cu nan gana eleccion y asina nan por sigui cu nan fechorianan.
Por conclui cu pa e eleccion di September proximo e makinaria berde lo sigui abusa cu e fondonan publico y finalmente e cuenta di tur e patronahe politico riba custia di pueblo lo ser presenta den e presupuesto supletorio 2017. Pues ta bisto cu fuera di tur nan sponsornan miyonario, Pais Aruba un biaha mas ta paga pa e campaña miyonario 2017 di AVP.