Mester implementa mas pronto posibel un reforma di e sistema di impuesto di tal manera cu tur ciudadano cu ta cumpli debidamente cu nan obligacionnan fiscal lo bay dilanti. Esencia di e reforma fiscal aki ta cu lo shift e peso di impuesto directo, por ehempel impuesto riba salario, entrada, ganashi y dividendo, pa impuesto indirecto, por ehempel derechonan di importacion y accijns. Esaki na opinion di e e lider di POR, Otmar Oduber, lo tin como resultado mas entrada pa gobierno y un regimen di impuesto cu riba su mes lo alivia e peso pa ciudadanonan di Aruba y na mes momento reduci e costo di haci negoshi y pues stimula hacimento di negoshi na Aruba.
Cumplimento eficiente
Otmar Oduber ta splica cu un reforma fiscal den cual ta shift e peso di impuesto di directo pa indirecto, e base di impuesto di nos pais y pues entrada di gobierno lo aumenta. Motibo di esaki ta cu esnan cu awe no ta contribui (suficientemente) lo cuminsa contribui (mas), manera e ciudadano cu ta traha sin paga impuesto, e comerciante cu no ta cumpli cu su obligacionnan fiscal y nos bishitantenan. Creando asina un sistema di impuesto cu ta mas sostenibel y husto. Ademas, procesonan di cobra, colecta y controla cumplimento cu impuesto lo bira mas eficiente, na opinion di Otmar Oduber.
Simplifica y restitui
Otmar Oduber ta sigui splica cu un elemento importante di e reforma fiscal aki ta simplificacion di nos sistema di impuesto, tanto esnan directo como indirecto. Den e cuadro aki lo duna atencion special na e derechonan di importacion, impuesto riba salario y entrada y lo revisa e sistema di aftrekposten. Ademas, lo elimina 48 impuestonan cu no of masha poco ta contribui na caha di gobierno y uza e recursonan cu ta bin liber pa mehora e control riba cumplimento cu nos leynan di impuesto. E reforma aki lo haci posibel tambe introduccion di un sistema caminda cu lo por restitui placa cu e ciudadano a paga di mas na belasting den un tempo cortico.
Stimula inversion
Introduccion di incentivo y instrumentonan fiscal nobo cu e meta pa stimula inversionnan den sector priva cu ta contribui na crecemento y diversificacion economico, ta un otro elemento importante di e reforma fiscal cu POR ta propone. Mescos, stimulacion di empleo di calidad, cu ta nifica cu mas di nos conciudadanonan lo por haya trabou cu ta paga un miho salario. Un otro elemento importante di POR su reforma fiscal ta reduccion pa un periodo di 1 aña di impuesto riba dividendo te na 0%, bou di e condicion cu por lo menos 50% di e suma cu ta wordo paga como dividendo na e accionistanan mester wordo inverti den un fondo di inversion pa desaroyo di sector creativo y tecnologico pa un periodo di minimo 5 aña. Ta papia pa su mes cu esaki lo duna un empuhe enorme na creacion di un pilar economico nobo pa nos pais. Mas inversion den sector creativo y tecnologico ta nifica mas empleo di calidad y mas crecemento economico, cu na su turno ta nifica tambe mas entrada pa gobierno, y na mesun momento ta logra mehora poder di compra di abo e ciudadano.