Home Uncategorized Aruba Tourism Authority contento cu e resultado RENOVACION DI VOTO MATRIMONIAL RIBA...

Aruba Tourism Authority contento cu e resultado RENOVACION DI VOTO MATRIMONIAL RIBA NOS BEACH UN EXITO ROTUNDO

SHARE

ORANJESTAD – Diamars dia 8 di augustus Aruba Tourism Authority hunto cu su oficinanan rond mundo a logra realisa un campaña particular treciendo mas di 160 pareha pa renoba nan compromiso di matrimonio. Esaki a tuma luga durante un bahada di solo riba Eagle Beach compaña pa tur e decoracion y celebracion den e estilo unico cu Aruba so por ofrece.

E evento a haya un acogida tremendo atravez di e rednan social poniendo Aruba destaca den diferente plataforma di noticia pa e ceremonia mas grandi di renobacion di votonan matrimonial cu a yega di celebra den Caribe. Di e manera aki un biaha mas Aruba ta demostra di ta e destino mas atractivo, pero tambe mas inovador pa loke ta trata e posibilidadnan y su mercadeo den e area Caribense. E storia aki a wordo comparti na mas di 308 diferente canal di medionan tradicional manera corant y revistanan. Tambe a conta cu mas cu 20 presentacion special y 14 segmentonan noticiero cu a bay den aire den e cadenanan di television mas grandi na Merca cu a yega na miyones di televidente.

E hashtag #ArubaIDo a trece mas cu 8.2 miyon di impresion riba Twitter for di comienso di e evento y riba Instagram esaki tabata tin un cobertura di mas di  15.2 miyon impresion. A.T.A. ta monitorea di serca determinando e efectividad di e strategia promocional, cu den un tempo relativamente cortico a duna resultadonan inmediato, positivo y desea.

A.T.A. a percura pa entre e mas cu 320 participante, a inclui algun pareha cu personahenan conoci den mundo di turismo, pero tambe celebridad Mericano manera Tamra y Eddie Judge, di e programa di television “The Real Housewives of Orange County” riba Bravo TV. Tur pareha participante tabata impresiona, contento y satisfecho. Mas cu claro tur a transmiti nan experiencianan riba rednan social manera Instagram, Snapchat y Facebook.

Aruba Tourism Authority ta gradici tur esnan cu a forma parti di e campaña publicitario aki y specialmente na tur e parehanan cu a haci e ceremonia masal posibel. Sigur Aruba ta luciendo un biaha mas y e imagen cu nos isla ta demostra di ta e destinacion perfecto pa parehanan bin compromete, casa y pasa honeymoon. Esaki sigur ta keda graba den e memoria pa miyones y miyones di persona rond mundo. A.T.A. tin conviccion cu resultado di e activacion aki ta bay trece su resultado positivo pa e añanan nos dilanti.