For di tempo cu mi a haya nocion di locual ta pasa rond di mi, famia tabata e fundeshi di e comunidad di Aruba. Famia tabata ta e centro di norma y balornan caminda tradicionalmente e Mama tabata tin e tarea di educa jiunan cu hopi diciplina. E solo cortá di wowo of bo prome y segundo nomber hunto den un solo frase ya caba tabata suficiente pa ponebo para straight. Pero cu cambionan drastico di tecnologia y bow influencia di otro culturanan tur esey a cambia. Durante e delaster dos decadanan, e demanda economico a haci cu e costumber cu mamanan ta keda cas ya no ta existi y cu e rutina diario di combina trabow cu famia a bai a costo di e tempo cu tabata dedica na famia. Y nos ta mira e consequencianan. Muchanan ta produci menos na scol, ta bai den depresion, ta drenta e mundo di criminalidad, di abuso di alcohol y otro droga y mucha muhernan jong ta sali na estado. Tur esaki ta afecta henter nos comunidad directamente.
Pa combati criminalidad mester cuminsa na e fondo. E stap logico ta pa cuminsa na elimina pobresa. Cu un debe nacional asina gigante no ta keda espacio pa inverti den e bienestar social di nos pueblo, pues tampoco pa hisa e minimumloon conforme e bestaansminimum. Pues e prome paso ta di subi e capasidad di compra di e famia. Amplia e cantidad di productonan di e canasta basico. Bin cu control estricto riba prijsnan den supermercado y tiendanan. Cambia e sistema di Directe Belasting pa Indirecte Belasting eleminando Loon & Winst Belasting (sin cu gobierno ta bai atras den entrada for di belasting). Promove agricultura y horticultura na cas. Promove industria di hemp den un economia circular. Banda di esaki, crea un Fondo pa Combati Pobresa cu lo wordo usa pa capacita esnan mas margina den nos comunidad haciendo uso di nan capacidadnan den labor manual. Yuda mamanan soltera sali for di nan situacion di pobresa, door di paga pa kinderopvang y transporte for di e fondo aki di moda cu nan por bai scol of traha y yega na un mihor entrada. Introduci reiskostenvergoeding pa esnan cu ta biba pariba di brug y ta traha na Oranjestad y hotelnan.
Manera ya menciona, pa combati criminalidad ta necesario pa elemina pobresa. Tambe ta necesario pa mantene hobennan positivamente activo durante e oranan despues di scol. ReD lo introduci e Club Escolar caminda den un ambiente relaha y sano hobennan por participa den deporte, teatro, musica y arte en general. Ta di vital importancia pa gobierno actua severamente contra ilegalidad. Tur nos costa mester ta 24/7 bow vigilancia di kustwacht y radar. Polisnan mester ta mihor entrena y mester haya bek e autoridad di detene ilegalnan. Polis mester ta mas visibel riba caya. Mester manda un señal cla na delincuentenan cu crimen no ta paga. Polis mester wordo equipa cu mas tecnologia moderno y mester por dispone di un forensic unit efectivo cu personal bon entrena. Cu legalisacion di cannabis ta regula su uso y ta decriminalisa usuarionan, pues menos trabow pa polis eynan, dunando nan chens pa dedica mas tempo na e criminalnan real cu ta forma un peliger pa nos comunidad. Bin cu un instituto apart di Jeugddetentie caminda hobennan cu a comete un crimen y ta cai sera no tin interaccion cu presonan adulto. Asina por traha mihor cu e hobennan aki riba nan resocialisacion y re-entrada den comunidad.
Partido ReD tin un compromiso cu tur esnan lagá atras y lubidá. Aruba mester cuminsa trata tur hende igual dunando tur hende e mesun oportunidadnan. Esaki ta e forma pa cuminsa na combati criminalidad, desde su fundeshi. Dia 22 di september bo voto por haci un diferencia, na bienestar di nos tur. Vota ReD.
Vota Julie de Cuba-Geerman – Candidata #3-partido ReD Democratico