ORANJESTAD, Aruba: Minister di Salud Publico, Cuido di Nos Grandinan y Deporte, Dr. Carlos “Alex” Schwengle a topa cu Davyck Franken, kende a haya e oportunidad di bay un seminario di Scouting na Azerbaijan.
Davyck Franken ta un hoben den Scouting y el a haci un biahe bastante largo di Hulanda te cu Azerbaijan, unda cu el a asisti un World Scout Youth Forum Azerbaijan 2017. E seminario aki ta na nivel di hobennan y pa cu esaki Minister Schwengle ta haya uno hopi bon.
Hopi biaha den deporte, gobierno, etc. por mira cu hendenan grandi ta esnan cu ta tuma decision pa hobennan. Pero den caso di e mundo di scouting a aserca hobennan y pidi nan pa bay vocifera kico ta nan vision, nan necesidadnan.
Minister Schwengle tabata sumamente orguyoso cu Aruba tambe a haya e espacio pa por a vocifera su punto di bista. A felicita Davyck Franken, su famia y tur esunnan cu a sostene den e logro aki. Minister Schwengle ta spera cu e hoben por ta un ehempel pa duna un aportacion den e mundo di scouting di Aruba, pa cu esaki crece un tiki mas.
Y diamars mainta Aruba su himno Aruba Dushi Tera a resona durante di e foro mundial na momento cu Scouting Aruba a ricibi for di World Scouting un reconocimento oficial como pais ehemplar den scouting.
Aparte di deporte y educacion, scouting ta duna un persona hopi disciplina. Tambe scouting ta duna bo e formacion y ta guia bo pa ta un miho ciudadano den futuro. Ta spera cu esaki ta un empuhe pe mundo di scouting Aruba por sigui crece.