Hopi di nos no ta wak e importancia di un enseñanza di calidad.
Ora nos papia di calidad no nesesariamente ta papia di e parti di digitalisacion, pero si di e materia cu ta wordo ofreci.
No por ta asina cu te awe ta hasi uzo di metodonan (buki) anticua pa duna les.
Muchanan no ta wordo prepara optimalmente pa e mundo demandante cu nos tin actualmente. Hopi di nos hobennan, ora di lesa of wak un noticia, no ta compronde e contexto di e noticia pasobra simplemente na scol mes esaki no ta bin bek den e bukinan c unan ta haya pa lesa.
Na Aruba hopi docente ta traha frustra, no pasobra nan kier traha sintiendo asina, pero mas tanto pasobra no ta duna oído ora cu kier trece ideanan nobo, of hasta bestel bukinan nobo pa uza den klas. Y asina mes cu tur e peso negativo aki, e maestro ta eherce su trabou cu amor y dedicashon.
E profesion di un maestro awendia no ta unicamente duna les, pero tambe ta un interior designer. Hopi ta esnan cu ta pasa nan vakantie ta cumpra materialnan pa asina por decora nan klaslokaal y hasi’e bunita pa asina e alumnonan por sinti nan mes na cas y trankil den e lokaal cu nan ta haya les.
Un maestro ademas ta un ITer, webdesigner, designer y un computertechnicus, pasobra e maestro mes mester cumpra su computer of laptop cu e lo usa bek den klas pa asina visualisa e les duna na e muchanan. E no ta unicamente e laptop, pero tambe beamer of television cu e lo uza. Sin lubida e proefwerknan cu mester wordo skirbi pa asina e mucha por traha.
E docente mester jena e LVS na tempo pa asina cada mayor por mantene e progreso di nan yui na bista.
Un maestro hopi biaha ta un banco tambe, unda mucha cu tin hamber y no tin di come ta acudi na e maestro pa busca ayudo pa su alimentacion na scol.
Loke un maestro ta pidi e mucha bek como recompensa ta su prestashon na scol.
Asina’ki nos por mira cu un persona den e profesion di maestro tin hopi mas responsabilidad cu simplemente duna les.
Y ainda mi no a bay den e parti di counseling, solushona conflicto entre alumno, duna guia na e mucha cu su curason a wordo kibra of ta pasando den momentonan difisil.
Teniendo tur esaki na cuenta, e ora e pregunta ta bin dilanti: ken ta zorg pa e maestro por sigi funciona optimalmente? Pasobra na final di dia un maestro tambe ta un ser humano cu sentimento. Y sigur un maestro tambe mester guia y ayudo pa asina por eherce su trabou optimalmente.
P’esey mes nos di POR ta kere den e cuido di maestro. Unda nan mester keda stimula y incentiva pa asina nan por duna e mihor di nan.
Esaki ta algo cu por logra door di hisa e calidad di nos sistema educativo pa asina e muchanan ta mihor prepara pa enfrenta e retonan cu lo haya riba nan caminda.
Ban evita y traha preventivo riba e fenomeno di “drop out”, creando oportunidad igual pa tur alumno y stimula “diferentiatie” den klas pa asina cada alumno por capta e lesmaterial optimalmente.