Home » Prome Minister Eman a pone prome piedra pa cancha deportivo pa casnan di FCCA na Cura Cabay Zuid

Prome Minister Eman a pone prome piedra pa cancha deportivo pa casnan di FCCA na Cura Cabay Zuid

by sxm
0 comment 55 views

ORANJESTAD – Den presencia di un grupo grandi di mucha y adulto, Prome Minister Mike Eman hunto cu Edwin Tromp, director di FCCA, a pone e prome bloki pa fundeshi di e mini cancha di futbol banda di e casnan di FCCA na Cura Cabay Zuid. E mini cancha aki ta situa riba un area deportivo cu ta bay wordo desaroya pa habitantenan di e compleho residencial aki.

Diaranson mainta tabatin un ceremonia riba e tereno cu a wordo cumpra door di FCCA pa desaroya e area aki pa su clientenan. E compra tabata necesario, ya cu den e area mes di e casnan no tabatin mas espacio disponibel. Edwin Tromp, director di FCCA, a splica cu desaroyo di e proyecto aki ta algo cu e fundacion tin palabra cu Gobierno for di aña pasa caba. Pero a tarda door cu mester a finalisa compra di e tereno. “Awo cu e ta cla nos ta dal bay,” Tromp a bisa.

Mini canchanan di futbol, cubri cu yerba artificial, ta e vision di Prome Minister MikeEman y su Gobierno pa wordo construi den diferente bario rond Aruba.  Ta proyectonan ta trahando riba nan pa algun aña caba. Esaki a wordo logra caba na Bushiri y Madiki, y awor por bisa cu esun di Cura Cabay Zuid ta birando un realidad. “Nos tabata kier pa e proyecto aki por a keda finalisa pa e muchanan por haci uzo di dje durante vakantie grandi di scol, pero no a logra. Nos ta spera cu e por ta cla hopi lihe pa e muchanan por haci uzo di dje  durante herfstvakantie,” Prome Minister Eman a bisa.

E mandatario ta super contento pasobra e ta algo cu su Gobierno a papia hopi di dje, no solamente internamente pero tambe cu FCCA. Hasta a traspasa casnan cu ta cay bou di Gobierno pa FCCA, y realisacion di prestamo, pa e fundacion por haya mas entrada, pa di e forma aki por realisa e pensamento di Gobierno pa brinda un miho calidad di bida pa ciudadanonan di e complehonan residencial manera esun na Cura Cabay Zuid.

E proyecto aki, Eman a bisa, no solamente ta dirigi riba e muchanan, ya cu ademas di e mini cancha deportivo cu yerba artificial, tin un “exercise track” cu por wordo uza sea pa cana of core. Tambe ta bay tin mashinnan di ehercicio, manera esnan cu tin riba Linear Park. “Nos a bin ta trahando pa prome logra un miho calidad di bida pa nos ciudadanonan, renobando cas y barionan, construyendo areanan di recreacion of di deporte. Nos ta logrando esaki y den e siguiente Gobernacion ta sigui pa e siguiente plan, cu ta pa construi complehonan residencial, treciendo un balansa pa crea un comunidad cu ta biba y percura pa otro”.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio