82
CANDIDATONAN DI MEP TA INTEGRO
STA. CRUZ — Den un campaña electoral semper mester tene cuenta cu oponentenan ta usa tur recurso pa mancha nomber di otro. E dicho “porco sushi ta busca muraya limpi pa frega su curpa”, ta aplicable.
Partido MEP a tuma nota di atakenan fuerte di oponentenan di AVP contra cierto candidato riba nos lista. Riba esaki nos di MEP mester enfatisa cu tur candidato cu a figura riba nos lista, a pasa un proceso di screening riguroso. Caminda tabata posibel, a confirma esaki cu screening cu cierto candidato a pasa den nan trabou.
Tur esaki a condusi na e mihor lista pa e eleccion aki, di hende homber y hende muher cu ta pone nan conosemento y experiencia disponible pa rescata nos pais. Tur candidato ta tene cuenta cu una bes cu nan a drenta den politica, oponentenan di AVP ta conosi pa tira hopi lodo. Esaki ta pasobra nan no por bai den debate na nivel, y mesora mester tira lodo.
Diripiente tur hende ta pedofiel! Hasta esnan cu e propio minister Dowers a duna nan posicion halto den gobierno. Djis puntra bo mes si gobierno di AVP lo a apunta nan riba e posicionnan ey, si nan lo a comete algo contra ley!
Puntra bo mes si nan tin tanto “prueba” di cosnan ilegal, pedofilia, rape, ladronicia, dicon nan no a bai Ministerio Publico!
E contesta ta simple: pasobra nan ta gaña, y pasobra unico meta cu nan tin ta mancha nomber di otro.
Si pa por a ocupa un posicion halto den gobierno of den comunidad, e candidato a pasa un screening riguroso hasta di seguridad nacional, ta absurdo pa oponentenan awor cuestiona esaki.
E tipo di acusacionnan aki ta mustra riba un realidad: AVP ta desespera, y no tin argumento pa gana ningun debate. Pesey ta recuri na sushedad y ataca hende. Esaki ta di lamenta pasobra inecesariamente ta daña nomber di hende. MEP ta hibando un campaña electoral di nivel, cu respet y tresiendo solucionnan padilanti. Y nos lo no desvia y cai den e campaña sushi di AVP.