Home Uncategorized Jacky van Putten: Mi ta un Sinberguensa

Jacky van Putten: Mi ta un Sinberguensa

SHARE
????????????????????????????????????

Mi a wordo tilda di ta un sinberguensa pasobra mi a pone un post na unda mi a yuda un señora di edad yega na su rolstoel cu tanto e tabata spera. E comentario tabata cu awo cu ta eleccion ta core yuda! Mi reaccion tabata fuerte pero despues el a ponemi pensa. Berdad mi ta un sin berguensa? Mi ta lanta mainta, tin cuminda, tin trabou, tin un dak riba mi cabes y mi tin un famia feliz. Cuanto di nos no ta asina, cu nos ta biba den nos ambiente no sabiendo kico tin den cura di mi bisiña.  Mi a wordo mustra cu cosnan ta bon na Aruba. Economia ta tremendo y e deuda astronomico cu nos ta aden ta pa stimula economia y nos futuro. Y mas cu tur cu e trabou no a caba, kier sigui mester 4 aña mas!

Nos hendenan ta contento pasobra miyones a wordo gasta den klinkers y asfalt pa asina no tin stof den nan cas , pero nos poder di compra a baha Banco Central ta señala y e placa no ta yega . A subi salario minimo pa asina nan biba cu dignidad aunke SER ta stipula cu pa un famia di 4 e entrada minimo mester ta 2500 pa asina nan por biba cu dignidad. Criminalidad a baha y nos pais ta hopi miho compara cu otro paisnan. Pero polisnan ta sclama cu no tin material, auto y autoridad pa actua y atraconan riba nos pueblo ya a yega un record.

Nos mester ta contento nos a haya un hospital nobo di mas cu 240 miyon  pero nos cuido a wordo aleha di nos y nos mesun yiunan di tera cu a studia den region pa docter no mag traha. Nos educacion a mehora compara cu antes, pero e drop-out nan ta mas halto cu nunca y esnan cu no ta gradua ta sigui subi. Nos maestronan ta wordo menosprecia y cuponan pa scol no ta suficiente. Ta pone canchanan di voetbal den barionan pa asina mama por wak nan yiu hunga, pero deporte a wordo elimina di scolnan, barionan y tur facilidad deportivo a wordo neglisha.

Nos ta contento cu un green corridor di mas di 700 miyon florin na unda nos por primi gas pa cinco minuut, pero segun indicacionnan, mamanan soltero y 60% di nos ciudadanonan ta biba bou di e nivel di pobresa, no a haya ni un oportunidad pa un tereno pa construi nan cas , corda un vivienda social  den 8 aña.

Nos grandinan ta contento pasobra tin lead light den nan bario pero no tin lugar pa nan ora nan no por yudanan mes mas. Director di Saba ta confirma esaki.  Pa un simpel rolstoel, loke nan tin derecho riba dje, e caminda ta desconci y dificil.  Ta papia di ta full green na 2020 y no por ni resolve nos problema di desperdicio y dumpnan ilegal y ta trapa riba tur ley di conservacion di naturalesa. Progreso pa crea cuponan di trabou pa nos yiunan di tera, pero ta permiti competencia inhusto laboral door di laga nos fronteranan hancho habri y negocia cu permisonan pa stranhero.

Mi mester tin berguensa di lanta y pensa cu loke nan ta pintado ta un cuadra di Picaso. Pero mi berguensa a caba, mi tin cu wak den cura di mi bisiña y realisa cu nos mester para pa nos Aruba y mas cu tur e calidad di bida di mi bisiña. Mi mester proteha e derecho di nan di por ta parti di e progerso y tambe tin un bida digno y cu calidad. Critica otro di ta sin berguensa no ta haci bo mes miho. Ami ta parti di e cambio, bo tambe POR ta. Mira e cura di bo bisiña y no para den e gras berde di bo mesun cura. Ami tin e potlood cora dia 22 di september mi berguensa a caba!!