Diaranson pasa Edjean Semeleer a wordo lansa oficialmente como candidato ariba lista di partido POR. Esaki sigur a sorprende hopi hende ya cu ningun hende no a spera esaki.
E discurso cu Edjean a duna ariba e anochi di lansamento tabata uno sumamente inspirativo y emotivo. Hopi ta esnan cu a compar’e cu e discursonan cu Sr. Betico Croes den feliz memoria tabata duna.
Edjean ta un yiu di tera cu no mester di introduccion, ya cu pa añas el resalta pa a mantene nos cultura y herencia cultural bibo atraves di su canto, su numeroso proyectonan musical y su manera di ta.
Un persona stima pa su pueblo cu a sa di cosecha triunfo pero tambe tabata tin su momentonan no mucho bon e.o. cu cierre di su restaurant.
Remarcable ta si, cu apesar di tur locual a pasa, semper Edjean a sa di lanta ariba y sigui cu e lucha pa bai dilanti.
Hopi ta esnan cu kier usa e factornan aki contra dje, pero mirando su honestidad, esakinan no a logra pasobra ta dilanti e ta bayendo.
Diadomingo ultimo Edjean tabata hunto cu e team dinamico y uni di POR den e bario cu a wak e nace y crese cu ta Dakota, unda cu portanan di casnan tabata wordo habri p’e cu inmenso placer, dunando Edjean e oportunidad pa splica e mision y vision cu e tin pa e proximo gobernacion.
Edjean ta un ehempel bibo di un gran luchador, como un entrepreneur local, un cantante sumamente stima y exitoso cu ta forma parti di esnan cu ta lucha pa mantene nos herencia cultural bibo. Un yiu di tera cu no solamente ta lucha pa su mes, pero tambe pa tur esnan cu kier logra algo positivo den bida.