Home » Desaroyo sostenibel di hubentud por wordo realisa cu pas y siguridad

Desaroyo sostenibel di hubentud por wordo realisa cu pas y siguridad

by sxm
0 comment 52 views

Oranjestad – Den cuadro di Dia Internacional di Hubentud cu ta wordo celebra mundialmente riba 12 di augustus 2017, Departamento Asunto Social, Seccion Bida & Famia kier haci uzo di e oportunidad aki pa splica na comunidad e servicionan cu ta ser brinda na mucha, hoben, adulto, famia y pareha.

 

Seccion Bida y Famia (SBF) ta un seccion di Departamento di Asunto Social (DAS). Nos ta un team multi-disciplinario di profesionalnan cu ta brinda terapia gratuitamente na personanan cu problema psicologico, social y emocional. Esun cu ta pidi yudansa ta haci esaki boluntariamente y no ta wordo forsa. Tur caso ta wordo trata na un manera confidencial.  Den SBF ta traha psicologonan/ortopedagogo pa  mucha, hoben, psicologonan pa adulto y tambe terapista nan di relacion, famia y pareha.

Na momento cu un cliente acudi pa yudansa na SBF, e mester presenta cu un carta di referencia di por ehempel dokter di cas, specialista of instancia social. Ora cu e cliente su turno yega, e lo wordo acerca telefonicamente pa haya fecha di cita pa e prome combersacion (Intake).

 

Pa por sigura pas y siguridad den bida di un mucha y hoben, ta importante pa enfoca riba e famia.

Esaki ta significa cu den un caso unda e mucha y hoben ta wordo referi pa terapia, lo analisa e situacion familiar y lo purba mas tanto posibel envolvi miembro nan di famia den e terapia.

Nos ta di opinion cu lo mester pone atencion na cada aspecto cu ta contribui na un resultado positivo den e desaroyo di e mucha y hoben, por ehempel: e relacion y comunicacion entre mayornan, pareha, rumannan y otro miembronan di famia (wela/welo, tanta/omo ect.)

Nos como adulto ta e spiel di influencia pa e mucha y hoben. Mucha ta observa/wak siña y haya habilidad door di wak accionnan di mayornan y demas miembro di famia y comunidad. Mucha no por duna loke e no tin.

 

Pues abo como modelo di influencia ta e fuente principal cu tin cu brinda e oportunidad pa mucha y hoben haya habilidad y herment necesario pa un bida saludabel di pas y siguridad.

 

Problemanan cu no por wordo trata na SBF ta por ehempel personanan cu tin un problema psikiatrico, personanan cu tin cualke tipo di adicion, personanan cu autismo, muchanan unda mayornan ta den un proceso huridico andando (divorcio cu hopi pleito, reglamento di “voogdij”). Tene cuenta cu pa un mucha y hoben ricibi ayudo/trayecto di guia, ambos mayor cu autorisacion legal (gezag) mester duna permiso pa esaki por escrito na SBF.

 

Nos di SBF ta enfatisa na pueblo di Aruba pa keda enfoca riba desaroyo sostenibel  di nos muchanan y hobennan pa asina nan por sigui biba den un ambiente di pas y siguridad.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio