Home » Hipólito “Eddy” Ras POR Pa medio di mehora economia por elemina impuesto indirecto riba e factornan cu ta influencia bestaansminimum

Hipólito “Eddy” Ras POR Pa medio di mehora economia por elemina impuesto indirecto riba e factornan cu ta influencia bestaansminimum

by sxm
0 comment 54 views

Bestaansminimum ta e suma mensual netto pa cubri costo di bida basico.

Den un comunicado di CBS di juni 2017, e bestaansminimum (costo di bida) netto mensual ta pa:

  • un persona adulto Afl 2.056,–.
  • un famia di dos adulto y dos yiu Afl 4.317,–.

Un luna tin un averahe di 4,33 siman (52 siman / 12 luna). E situacion ta señala cu pa siman e bestaansminimum pa un persona adulto ta Afl 474,83 (Afl 2056 / 4,33 siman). Cual cu pa dia ta Afl 67.83. Empleado cu ta gana un salario minimo ta bin cu mas of menos Afl 1.650,– netto pa luna. E cifranan ta demostra cu pa luna entre salario minimo netto y bestaansminimum, tin un diferencia di mas of menos Afl 406,– (Afl 2.056 – Afl 1.650). E diferencia di Afl 406,– ta indica, cu un persona cu ta gana salario minimo tin cu bay traha 6 dia extra pa cubri su deber y necesidad mensual (Afl 406 / Afl 67.83 = 6 dia). E scenario treci dilanti ta situacion di un adulto sin yiu pa cria.

 

Pa medio di rapport di CBS por a mira cu tin 10 factor cu ta influencia e bestaansminimum. E 10 factornan ta: 1. Cuminda y bebida, 2. Paña y sapato, 3. Gastonan di vivienda, 4. Acesorionan pa cas, 5. Salubiridad, 6. Transporte, 7 Comunicacion, 8. Recreacion, cultura y desaroyo, 9. Educacion, 10. Otro bienes y servicionan.

 

Na Aruba tin un canasta basico cu ta consisti di 11 producto cu e prijsnan ta wordo stipula y controla pa gobierno. E 11 productonan ta: aros, hariña, sucu, babyfood, lechi pa baby, koffie, te, margarina, manteca, lechi di polvo y lechi liquido pa koffie. Riba tur e productonan cu ta pertenece na e canasta basico tin cu paga impuesto indirecto (BBO / BAZV) momento di hasi compras. Prijsnan cu tambe ta wordo calcula pa gobierno ta: pisca, galiña, webo y pan blanco.

 

Door di compara e factornan cu ta influencia bestaansminimum y e canasta basico, por mira e motibo dicon e diferencia entre salario minimo y bestaansminimum ta 6 dia di trabou extra pa luna. Aruba ta un pais cu mayoria di su productonan ta bini for di exterior. Esey ta hasi cu si prijsnan di producto of transporte den exterior subi, e aumento ta bay tin influencia riba e bestaansminimum.

 

Si tuma un di e factornan cu ta influencia e bestaansminimum cu ta cuminda y bebida, berdura y fruta ta productonan cu no ta paga invoerrechten pero, impuesto indirecto ta wordo poni riba e prijs momento di hasi compras. Pa medio di elimina impuesto indirecto riba e factornan cu ta influencia bestaansminimum, port trese e salario minimo y bestaansminimum mas den balans cu otro.

 

Elemina impuesto indirecto riba (sierto) factornan cu ta influencia e bestaansminimum, ta hasi cu gobierno mester eherce un control fuerte ariba su entradanan y su gastonan. Esey ta hasi cu prome cu traha pa reduci bestaansminimum, mester traha na prome lugar pa mehora e parti economico pa por tin mas entrada.

 

Pa medio di mehora economia, ta bay tin mas variasion den empleo y cu miho salario. Door di crea mas empleo cu mihor salario, cuidadanonan por hasi mas compras. E situacion menciona ta hasi cu impresanan ta bay contrubui mas cu impuestonan cu nan tin cu cumpli cu nan. Pa mehora e economia POR lo:

  1. expande turismo pa medio di fast ferry entre e islanan Aruba, Boneiro y Corsou.
  2. introduci pilar economico nobo cu ta e curason di Fourth Industrial Revolution.

 

E pilar economico nobo lo ta enfocando riba companianan high tech, E-business, startups, business incubators, companianan fintech y otro actividadnan economico innovativo basa riba tecnologia nobo

Pa ta atractivo pa introduci un pilar economico nobo lo:

  1. Introduci incentivonan fiscal.
  2. Stimula creacion di un fondo di inversion.
  3. Brinda e infrastructura necesario cu e meta pa desaroya un sector economico nobo.

 

Si no traha prome riba e parti economico, como gobierno bo ta maneha un pueblo riba un manera iresponsabel. Iresponsabel paso e situacion financiero di Aruba no ta esun mas stabiel nan e momentonan aki. Si traha riba e factornan cu ta influencia bestaansminimum sin crea entrada nobo ta mescos cu crea debe. Vivienda ta un di e factornan mas grandi cu ta influencia e bestaansminimum. Na mes momento gobierno mester traha na un manera responsabel riba e parti financiero. Pa medio di mehora economia, drecha e parti financiero y crea mas empleo cu mihor salario, habitantena lo bay tin un miho calidad di bida y bienestar general.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio