Home Uncategorized Studiantenan cu un solo pensamento Nos ta bay afo cu e meta...

Studiantenan cu un solo pensamento Nos ta bay afo cu e meta di logra nos diploma

SHARE

ORANJESTAD, Aruba: Pa 3 dia largo studiantenan a biaha pa nan destino unda cu nan lo sigui cu nan estudio. E studiantenan a pasa den diferente proceso unda cu nan mester a prepara nan mes bon pa asina por a bay afo. Hopi di nan tabata contento pa sigui cu un trayecto nobo, mientras tabatin algun cu tabata contento pa bay pero tristo.

 

Jaydy Croes su estudio a hiba na Rotterdam, unda cu e lo studia social work. El a scoge pa esaki pasobra el a termina su estudio na EPI Salubridad & Servicio den welzijn. Jaydy Croes a bay Hulanda pa asina sigui mehora su mes den social work. Jaydy Croes ta recorda tur studiante bay pa nan meta pa asina logra esaki y pe mayornan apoya nan yiu, pasobra nan lo ta orguyoso di e yiu ora e logra su meta.

 

Stephany v/d Linde a bay Hulanda, unda cu e lo studia na Hogeschool van Rotterdam y aki e lo ta preparando su mes pa bira docente di Ingles. Su estudio lo ta di 4 aña y e no sa ainda si e lo sigui asina cu e termina su estudio. Stephany v/d Linde a indica cu no ta facil pa studia afo pasobra nan ta lagando nan famia, pero studiantenan a bay pa algo miho.

 

Na Nijmegen e studiante Noc Rasmijn lo sigui cu su estudio, unda cu e lo ta studiando Biomedisch y investigacion di laboratorio cual ta un estudio di 4 aña pa bachelor y 2 di master. “Na mi mayornan, mi ta hopi gradici pa tur loke nan a haci pa mi. Sin nan mi no ta aki awe y cu mi ta haci mi best pa asina ora mi t’ey bek, mi bisa nan cu mi a logr’e”, el a expresa. Tambe el a conseha tur studiantenan pa enfoca pa asina nan por logra nan meta.