ORANJESTAD, Aruba : “Mi a yega di experencia entregamento di lista diferente biaha caba, pero semper cu un otro pechi bisti. Pero loke cu mi a experencia diabierna merdia tabata hopi grandi”, esey tabata e prome reaccion di Robert Candelaria, candidato #7 riba lista di AVP, durante un programa di radio diasabra mainta na Canal 90. “Su ex coleganan di Polis a elogia e organisacion, con e parada di AVP a cana trankil, bon hinca den otro, siguiendo instruccion di Polis, e cantidad di hende a haci un impacto grandi”.
Robert Candelaria a conta cu su prome dianan den politica tabata hopi bon, a tene varios reunion di contacto cu ex coleganan Polis y cu su famia. E reaccion ta masha positivo. E ideanan cu ta yegando durante e reunionnan aki ta aporta grandemente den plannan concreto pa combati criminalidad mas efectivo ainda. E plannan aki mester ta realistico, pues nada di priminti cosnan cu de facto, tur hende sa di antemano cu no por logra.
Mientras cu di un banda, hunto cu partnernan den e cadena hudicial y di siguridad, ta formulando un plan concreto pa atende den un forma mas efectivo cu e retonan, di otro banda Robert Candelaria no por a keda sin gradici partido AVP, specialmente e lider Mike Eman pa su apoyo y pa a mira su cualidadnan pa por sirbi e comunidad aki.
E ta convenci cu den e siguiente dianan lo topa cu hopi mas grupo den comunidad, pa asina hunto yega na un plan concreto con hunto cu pueblo, lo combina e man fuerte di husticia banda di e man suave di compasion pa yuda esunnan cu ainda ta na tempo pa tuma e caminda corecto den bida.
Ta invita comunidad pa “Like” su pagina riba Facebook pa por keda bon informa di tur ultimo desaroyonan, reunionnan y encuentronan cu Robert Candelaria den e temporada aki di campaña.