ORANJESTAD, Aruba – 5 di Augustus 2017: Minister di Salud Publico, Cuido di Nos Grandinan y Deporte, Dr. Carlos “Alex” Schwengle a reuni cu varios empleado y ex empleadonan di SABA, atendiendo e problema di “schaal” di nan salario. Un proceso cu a cuminsa desde aña 2001.
Un grupo grandi di empleadonan di casnan di cuido resortando bou di SABA a haya nan confronta cu diferencia den nan nivel di salario, locual a conduci na un estudio. Lamentablemente e resultado di e estudio y ehecucion di e cambionan proponi a keda pega pa añanan largo na diferente departamento di Gobierno.
Minister Dr. Carlos “Alex” Schwengle a percura pa accion den e proyecto aki, a cana tras di e documentonan, a pidi cooperacion di coleganan Minister y cu a conduci cu porfin a keda cla.
Minister Schwengle a entrega un envelop cu e decreto gubernamental na cada un di esunnan cu mester a haya un adaptacion di salario. E tabatin un sonrisa di satisfaccion riba su cara, pasobra e tabata consciente cu e proceso a dura mucho largo.
Ministerio di Salud Publico cu colaboracion di sindicato ABV, Departamento di Recursonan Humano di Gobierno (DRH) y directiva di SABA a yega na un proposicion. Nan a dicidi di reserva 3 miyon den presupuesto y lo paga e trahadonan e atraso den un periodo di 3 aña.
E empleadonan tabata masha contento cu porfin e decision a keda tuma den Minister Raad. Awo DRH hunto cu Departamento di Financia mester traha riba ehecucion di e decision di Conseho di Minister, di cual ora pasa e presupuesto lo cuminsa paga e retraso na empleadonan.
Minister Dr. Schwengle a sigura e trahadonan cu su maneho lo keda asina aki y si Gobierno di AVP keda, por conta cu lo otorga un di 3 aña. Un di dos termino di Minister Schwengle sin duda lo inclui continuacion di reorganisacion pa cuido di grandinan y despues pa e demas instancianan di cuido cronico Aruba.
Nan kier bin cu un maneho mas profesional y cu ta haci e mehoransa di calidad posibel. Por tin mas y miho di cual SABA a haci hopi mehoracion den nan maneho. E contacto entre SABA y Minister Schwengle ta hopi bon cu otro, unda tin e palabracion cu e intramoral di cuido di grandinan lo bay bou maneho di AZV. Aworaki ta haciendo e “voorwerk” y asina cu eleccion pasa, lo cuminsa ehecuta tur trabou.
Directiva di ABV ta contento cu a yega un claridad pa cu e placa di schaal cu empleadonan tin di ricibi. President di ABV, Gina Maduro, a splica cu desde 2015 nan ta representa e empleadonan unda cu nan a topa cu e problema aki. E empleadonan tabata wardando desde 2001 pa ricibi e placa di schaal, unda cu ABV hunto cu e miembronan a sinta cu diferente departamento hunto cu SABA. E trabou pa por a logra
esaki tabata uno enorme y pa cu esaki Gina Maduro a gradici tur esnan cu a duna un man pa asina logra haya e landsbesluit aki. Nan lo cuminsa haya e pago na 2018 y esaki lo keda haci den 3 aña.
ABV ta bezig riba cu e trayecto aki pa 2 aña caba y e reaccion di e miembronan ta uno hopi contento. Esaki ta pasobra por fin nan ta mira un claridad y lo bay haya nan placa.