Home » DVG: hende ta haya dolor di cabes leve te cay flauw door di calor severo Preveni golpi di calor y cu temperatura di curpa ta subi

DVG: hende ta haya dolor di cabes leve te cay flauw door di calor severo Preveni golpi di calor y cu temperatura di curpa ta subi

by sxm
0 comment 57 views

ORANJESTAD, Aruba: E lunanan di mei, juni, juli y augustus ta tradicionalmente esunnan mas calor di aña cu temperatura cu por yega 33 grado Celsius of hasta mas. Tin aumento di riesgo pa haya golpi di calor, miho conoci como “zonnesteek” of “heatstroke” ta ora e curpa keda pa un tempo largo den calor, p.e. ora un hende grandi keda den un luga calor sin fan of airco. Tambe ora e temperatura di curpa subi, esta door di  “zonnebad” of exposicion na solo pa largo tempo. Dr. Wilmer Salazar, consehero medico di Departamento di Salud Publico (DVG) ta subraya cu e medidanan di prevencion ta sumamente necesario, particularmente pa muchanan bou di 4 aña, personanan di 65+, personanan cu tin cierto enfermedad cronico y pa esunnan cu ta traha of practica algun deporte den solo durante di dia.

“Durante e dianan aki di calor of ora keda den solo pa un tempo largo, tur hende ta soda mas, e curpa ta perde mas likido cu normal y esaki por tin como consecuencia cu e persona no ta sinti bon. Ora ta papia di no sinti bon”, segun dr. Salazar, “esaki ta referi for di un dolor di cabes leve te na cay flauw debi na un condicion severo di calor. Den e dianan di calor un persona ta core mas riesgo pa haya un ataca di curason of stroke”.

 

E factornan di riesgo pa haya golpi di calor of cu temperatura di curpa ta subi ta varios manera:

  • edad: baby y mucha bou di 4 aña di edad, adulto mayor di 65 aña di edad;
  • practica deporte durante di ora di mas calor (merdia), p.e. hunga den solo, core bais, tene careda of cana den solo;
  • exposicion na solo p.e. bay laman pa oranan largo of drumi band’i laman pa haya un color bruin, of traha den solo pa basta rato;
  • persona cu ta tuma remedi pa presion halto, anti psicotico of anti depresiva;
  • persona cu tin malesa cronico di curason, pulmon y/of obesidad.

 

Dr. Salazar a sigui elabora cu e sintomanan ta depende di e edad di e persona y duracion di exposicion na solo of calor, tambe di e otrofactornan di riesgo ya menciona. E sintomanan ta:

  1. Debilidad
  2. Dolor di cabes y cabes ta drei
  3. Curason ta bati lihe
  4. Halamenti di rosea hopi lihe
  5. Cuero ta bira cora y ta sinti cayente
  6. Tin hopi sed
  7. A stop di soda
  8. Cram di musculo y dolor

Calor extremo den forma di golpi di calor ademas di e sintomanan ya menciona por causa otro sintoma tambe manera desorientacion, falta di coordinacion, por cay flauw, sinti ansiamento, halucinacion y perdida di conocemento.

Ora presenta golpi di calor of cu temperatura di curpa a subi, mester busca asistencia medico mesora mientras ta:

  • tene e persona trankilo y den un luga fresco;
  • baha e temperatura di curpa door di los paña na su curpa, fria e curpa cu un serbete of paña muha cu awa friu of di cranchi, pone ijs den forma di icepack bou di brasa, na nek, lomba, riba stoma y meimei di e pianan;
  • lag’e bebe awa no mucho friu si e persona ta consciente;
  • laga e persona drumi plat y hisa su pianan;
  • no duna ningun remedi pa baha keintura.

 

Pa mas informacion por tuma contacto cu Departamento di Salud Publico na telefon 5224200. tambe por subi riba facebook di DVG Aruba.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio