Home » Publico grandi a bishita e Open House exitoso di Hospital

Publico grandi a bishita e Open House exitoso di Hospital

by sxm
0 comment 61 views

ORANJESTAD, Aruba –: Diamars mainta Hospital tabatin un Open House unda publico por a cera conoci cu e diseño paden di e edificio nobo. Den careda di 300 persona a presenta pa asina mira e cambionan cu lo bay tin. Nan tur a haya un rondleiding na e futuro departamento di Emergencia y e prome piso, cual lo bira den futuro cercano e piso pa departamento di Maternidad. Esunnan presente por a haci diferente pregunta na e personal di Hospital y na final por a disfruta di algo pa bebe y un dushi cupcake. Nan a keda encanta cu e cambionan amplio y ‘top of the line’ cu Departamanto di Emergencia a haya. Tambe a admira e cambionan moderno di e departamento di Maternidad unda a mustra e bishitante entre otro e Verloskamer cu tin e posibilidad pa por haya baby bou awa.

E director encarga cu cuido medico na Hospital, sr. Ezzard Cilié, tabata contento di mira e cantidad di persona cu a presenta na e Open House y por a mira cu nan tabata sumamente orguyoso. E organisadonan mes tabata orguyoso di mustra e bishitantenan e edificio nobo, Ezzard Cilié a expresa. Hopi di e trahadonan ta emociona y entusiasma pa drenta den e edificio aki y ta wardando p’e fecha yega.
Nan a percura pa comparti e experiencia aki cu e pueblo pa conoce e eficio nobo (New Bed Tower), pasobra e Hospital ta di pueblo Arubano. Tur esunnan cu a presenta, hendenan hoben y grandi, tabata impresiona pa loke nan a mira. E director medico di Hospital a haya cu e Open House tabata exitoso, unda cu e trahadonan mes di Hospital a percura pa duna e guia den forma masha nechi mes.

E edificio nobo ta kedando cla pero mester finalisa algun cos ainda prome cu por muda. Aworaki nan ta den e fase di mira e rekisitonan cu mester pa asina traspasa e pashentnan eyden. Esaki ta nifica cu ta controlando cu tur cos ta traha bon; e cranchinan ta traha, tur luga cu ta exigi oxigeno ta traha, coriente ta traha, belnan no mag faya y hopi mas. Nan mes ta pasa riba tur esaki y ta un pa un nan ta haciendo e control aki. Hospital tin e responsabilidad grandi di no hinca un pashent den peliger durante e traspaso, p’esey ta percura pa controla cu tur cos ta funcionando debidamente y cu tur cos ta na su luga manera debe ser.
Clustermanager Facilitair Bedrijf di Hospital, sr. John Fun, ta contento di mira e cantidad di persona cu a presenta pa haya un rondleiding. Recientemente e edificio a keda entrega inoficialmente y a dicidi di tene e Open House pa asina comunidad y e trahadonan cuminsa cera conoci cu e edificio nobo aki. E Open House pa trahadonan e dia anterior tambe tabata exitoso. Aunke cu nan ta pasando cu hopi di e trahadonan den e edificio nobo, ainda falta personal cu no a haya e oportunidad aki. Mas o menos 250 di e trahadonan a bishita e edificio nobo dialuna. Lo percura pa ofrece mas tempo cu e trahadonan den e edificio nobo pa asina nan cuminsa sinti nan mes na cas den e edificio.

Un di e bishitantenan di e Open House pa publico, sr. Franklin Kock, a comenta cu e rondleiding tabata bon organisa. E adelanto di e trabounan riba Hospital ta uno bon. Franklin Kock a indica cu e ta di e generacion unda cu e Hospital a muda di San Pedro pa Dr. Horacio E. Oduber Hospitaal. E cambio cu tin awo ta cu e Hospital a bira mas moderno y ta pensando mas riba e pashent y famia di e pashent. “Esey ta algo importante den Eerste Hulp, pasobra un persona cu ta bin pidi ayudo y e ta serio mester por vang op tur dos”, ela expresa. E structura di separacion di cambernan unda esunnan cu tin trauma of no, esunnan cu ta sinta ta warda nan turno y no ta mira ora ambulance yega cu herido, ta uno bon.
Angelique Koolman tambe a bishita e Open House diamars y a haya cu e rondleiding tabata uno hopi bon y bon organisa. A parti e gruponan di cual e ta haya cu e guia a duna un bon splicacion y cu e Hospital a keda bunita. Por a mira cu e ta

hopi amplio, unda cu e departamento di Eerste Hulp ta bon comparti den e diferente camber y di cual tur tin nan funcion. E structura di e cambernan ta hopi bunita y esaki ta un bon progreso pa Aruba.

Mayoria di esunnan presente tabata masha impresiona cu e edificio y e comentarionan ricibi a haci cu e organisadonan di e open house a keda sumamente satisfecho.
Hunta di Directiva y staf di Hospital ta gradici cada persona cu a presenta y a bishita e Open House di e edificio nobo. Cualkier persona cu no a haya chens pa e rondleiding por mira tambe un video tour di e Departamento di Emergencia, e Departamento di Maternidad y tambe e futuro Departamento di Mucha den e edificio nobo riba nos website www.arubahospital.com of riba nos pagina di Facebook.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio