‘Un cas bo no por construye riba un fundeshi debil, puntra bo mes con fuerte Aruba su fundeshi ta awe.’ E siman aki sigur ta uno importante caminda cu diaranson miembronan di Plataforma Politico Pueblo Orguyoso y Respeta (POR) lo firma un protocol importante basa riba principionan fundamental di e partido y diabierna lo entrega lista di tur personanan cu a uni na E Forsa Nobo POR. Na mes momento, ta un siman cu pa POR ta habri cu anuncio di varios candidato nobo.
Durante di e conferencia di prensa semnal cu a tuma luga diamars lider di e partido Otmar Oduber a presenta 6 candidato cu ta postula nan mes riba e lista pa dia 22 di september lo or bay urnanan electoral cu e lista aki. “Desde cu e partido aki a wordo funda, sr. Andin Bikker y mi persona a papia riba con nos kier trece un biento fresco pa Aruba, un cambio den politica y gobernacion pero tambe un cambio den mentalidad y con por eherce/haci politica na Aruba. A base di esaki tin 4 pilar cu a forma e base di cual a forma e partido aki esta e parti di pragmatismo, progresividad, integridad y comutarismo. Ta atende cu e problemanan y dolornan di cada un grupo den nos comunidad segun exigencia di esaki. Cu bo ta atende esakinan a base di metodonan moderno y naturalmente cu integridad halto. Poniendo e peso bek den Parlamento di Aruba pa loke ta e control y transparencia cu bo kier exigi di gobernantenan pa por ilustra e politica nobo cu nos kier propaganda como ‘E forsa nobo POR’.”
Tur esaki POR ta refleha bek tambe den e Plan di Accion cu a wordo haci publico cu a sali for di curason di tur e diferente institutonan akinan na Aruba . A reuni cu mas di 70 instancia y a duna e oportunidad mas cu dos luna largo na comunidad, pa a duna comentario of sugerencia. Finalmente, dialuna a aproba den conseho di partido, e programa y vision di partido cu desde otro siman lo ta conoci na henter comunidad.