Home Uncategorized Plataforma POR ta amplia mas ainda cu adkisicion recientemente di 6 miembro

Plataforma POR ta amplia mas ainda cu adkisicion recientemente di 6 miembro

SHARE

Plataforma Pueblo Orguyoso y Respeta (POR) a introduci 6 candidato diamars, durante di conferencia di prensa. Diferente di e candidatonan aki ya a wordo introduci den prensa caba durante di e siman cu a pasa y ainda tin otronan cu lo bay wordo anuncia pronto. Den mesun conferencia sr. Oduber a bolbe haci peticion mirando e dianan druk cu tin nos dilanti pa tur hende respeta otro.

Un di e miembronan nobo di POR ta Dr. Mercedes Rivera cu ta un internista pa mas di 20 aña na Aruba, Gregory Milliard atleta profesional local y Internacional y hopi dedica na nos hobennan enfocando riba e aspecto di balor y etica moral. Rolando de la Cruz ta un ‘hende di tur hende’ , un persona  cu ta representa y ta fundeshi di e comunitarismo cu nos ta papia di dje.  Sr. Raymundo Dijkhoff ta un persona cu sr. Oduber a traha cu ne den pasado y a siña respete pa su balor cu e tin den comunidad. Martinus ‘Rien’ Hurkmans ta un trahado social cu mas di 10 aña di experiencia na Departamento di Asuntonan social banda di e hecho cu e ta un cantante tambe. Abdiel Illidge su creencia y su bida cristiaan aki na Aruba ta grandi. Mayor di un hoben cu ta autista y cu tin un cariño y atencion special pa e grupo aki, banda di su deseo pa traha riba envolvimento di Cristianismo akinan na Aruba.

Asina por mira cu cada biaha mas y mas persona ta uni su mes na E Forsa Nobo POR. Riba POR su lista ta sumamente varia y tin candidatonan cu ta representa diferente problema/ area di preocupacion cu tin den comunidad. Nan ta uni nan mes na e lista tambe cu e mision pa traha pa adelanto di cada ciudadano.

“Nos ta haci un biaha mas peticion pa ban respeta otro, ban mantene politica na un nivel halto, ban discuti di problemanan cu ta atende cu e necesidad di comunidad di Aruba y no cu ta toca atakenan personal na un politico of famia di un politico. Sigur tampoco no na material of pertenencianan di niun persona. E suplica aki ta bay tambe na tur hende cu ta sostene nos partido tambe. Pa respeta opinion di cada un persona cu ta biba akinan na Aruba. Nos ta biba den un democracia y ketobay nos ta celebra democracia. Si tira un bista un poco pazuid di nos  di kico tur ta tumando luga na Venezuela den e dianan aki, laganos reflexiona riba e tristeza cu nan ta pasando aden aworaki y riba e dolornan cu tin eynan, pasobra eynan nan no por celebra democracia. Democracia ta algo cu nos antepasadonan a lucha pe y a logra tambe, bisando esaki laganos respeta institutonan manera Conseho di Supremo Electoral cu ta independiente di gobierno y di parlamento. Ban respeta e leynan cu tin y duna espacio na nos mando policial pa por sigura cu cada persona cu ta bay forma parti di e contienda electoral aki desde diabierna awo caba na entregamento di lista. Respetando otro , bo mes ta gana un respet grandi den comunidad. Esaki ta e mensahe cu POR kier manda na tur nos sostenedornan y tur partido cu lo forma parti di e contienda electoral,” sr. Oduber a termina bisando.