Home Uncategorized Drs. Shailiny (Shai) Tromp-Lee di MEP: Salud y cuido di nos grandinan...

Drs. Shailiny (Shai) Tromp-Lee di MEP: Salud y cuido di nos grandinan mester bira un prioridad

SHARE

Un aspecto cu mi ta topa durante mi bishitanan di cas pa cas y cu tin mi masha preocupa ta e observacion cu diferente hende grandi ta biba nan so y no tin e cuido y yudansa necesario. Por cierto esaki tabata situacionnan cu mi a encontra caba durante campaña 2013 y cu gobierno no a trece niun mehoracion pa nos grandinan.

 

Problemanan di nos grandinan

Cu un alegria nan ta habri nan porta y ta lagabo pasa paden. E alegria riba e grandi su cara ta pone cu mesora mi ta pone cu mi ta tuma mi tempo pa sinta combersa. Hopi storia nan tin pa comparti pero loke mas ta haci impacto ta por ehempel ora e lagrimanan ta cuminsa basha ora nan bisa bo cu nan famia no ta worry cu nan, of cu nan no sa haya bishita. Otro aspecto ta e echo cu tin algun di e grandinan cu mi ta bishita ta indica cu e placa no ta yega pa nan por cubri nan gastonan di luna of cu no ta resta pa nan por haci algo di placer.

Sigur un punto di iritacion y preocupacion ta e cobransanan inhusto di belasting cu nan ta ricibi y cu nan sa cu nan no por paga of defende nan mes contra. Asina mi por keda menciona retonan cu diariamente e grandinan ta indica cu nan mester surpasa. Pero e reto di mas grandi ta keda esun di cuido y salud. 

Un otro preocupacion grandi ta cu nos grandinan mescos cu tur otro hende tin cu warda varios luna prome cu haya un cita cu specialista cual sigur den nan situacion hopi biaha por tin consecuencianan grave y por empeora nan situacion. Otro preocupacion ta cu e grandi en cuestion, of su famia, no ta logra haya un lugar den un cas di cuido p’e. Riba dje e realidad ta, cu ta dificil pa haya un persona di confiansa pa bin cuida di e grandi na cas of financieramente e grandi of su famia no por carg’e.

 

Scarcedad di Cas di Cuido:

Na mes momento mi ta haya informacion di esnan cu ta traha na Casnan di Cuido pa nos grandinan cu tin lista di espera largo y cu fondonan disponibel no ta yega pa duna e grandinan e cuido y bida cu nan merece. Na mes momento ta constata cu Casnan di Cuido falta di mantencion. Nos por menciona por ehempel San Pedro cu ya pa algun tempo e parti dilanti ta cera pa renovacion pero te ainda nada. Un Paviljoen tambe cu sigur ta na beurt pa haya un renovacion completo. E situacion aki ta haci cu e cuponan pa nos grandinan ta bira mas limita ainda. Otro aspecto cu no por perde di bista ta e realidad cu e grupo di nos grandinan ta sigui bira grandi cual ta haci cu e problematica aki ta uno cu ariba termino corto mester keda atendi cu ne.​

 

Prioridad pa solucion:

Pesey MEP lo percura pa pone e cuido y salud di nos grandinan como prioridad. MEP lo percura pa brinda un cuido digno na nos grandinan. MEP lo mehora e calidad di cuido medico door di entre otro trece mas geriatra (specialista pa hende grandi) cu ta specialisa ariba e tereno aki. MEP lo percura pa e renovacionnan necesario tuma lugar cu urgencia. Otro manera cu MEP kier trece alivio financiero pa e grupo aki ta door di rebaha e prima di AZV pa pensionadonan. Alabes lo elimina pago di belasting riba e pensioen di biehes pa e grandinan por keda cu mas placa den nan cartera.

Nos grandinan, na cas of den Casnan di cuido, mester por biba bou di condicionnan aceptabel, nan mester por haya e cuido di calidad cu nan merece. Nos grandinan a traha asina duro pa progreso di nos pais y awor mester por gosa di un bon y dushi bida.

Mi kier remarca cu enberdad un gobierno responsabel mester haci tur posibel pa nos grandinan tin un bon y dushi bida pero ta keda na cada un di nos pa mustra respet y gradicimento na esunnan cu a lanta y cria nos. Duna nan e atencion y cuido necesario. Mas cu tur cos e amor y cariño pa nan biba un bida den un comunidad social y cu alegria y dignidad. Ban mehora con Aruba ta cuida di nos grandinan!

Mirando e problematica di ‘vergrijzing’ ami lo boga pa bin cu un Cas pa nos grandinan den e disticto di Noord. Un di e districto di mas grandi di Aruba. Beneficio di tin un Cas di Cuido den e mesun districto ta facilita e famia pa por mantene contacto y bishita e grandi cu mas frecuencia y e grandi ta keda biba den un area conoci y cu hendenan di su vecindario.