Home » AVP ta sali pa entrega su lista victorioso na Censo for di Veld di Cricket na Vondellaan diahuebs awo! “Nos lo t’ey prome cu 4’or y sin stroba ningun partido politico”

AVP ta sali pa entrega su lista victorioso na Censo for di Veld di Cricket na Vondellaan diahuebs awo! “Nos lo t’ey prome cu 4’or y sin stroba ningun partido politico”

by sxm
0 comment 57 views

ORANJESTAD – Diamars atardi partido AVP a yama un conferencia di prensa extraordinario caminda lider di AVP, Mike Eman, a hiba palabra. E ultimo dianan tabata tin confusion di e sitio cu ta sali y tambe e orario di entrega di lista di e partido berde. E siman cu a pasa, e intencion tabata pa sali for di ‘Green Square’, pero esaki awor a keda cambia oficialmente pa ‘Veld di Cricket’ riba Vondellaan.

Eman a bisa cu partido AVP a hiba diferente combersacion cu institutonan importante di pais Aruba pa garantisa cu e proceso di entrega di lista di 4 di augustus awor ta bay di un forma cu na Aruba ta custumbra cu ne. E idea ta cu simpatisantenan por y ta mustra nan pasion pa nan partido, pero alabes ta logra garantisa cu esaki ta bay di un forma trankil y ordena. Entregamento di lista, el a splica, ta algo cu henter comunidad ta hopi pendiente di dje. Tin un lapso pa entrega lista, cu ta for di 9’or di mainta te 4’or di atardi. AVP a constata cu e dos partidonan grandi a anuncia e luga for di unda nan lo sali pa entrega nan respectivo lista, hunto cu nan simpatisantenan e siman cu a pasa. E conclusion ta cu e dos partidonan ta hopi cerca di otro.

Mirando cu ora AVP organisa evento riba Green Square esaki ta ocupa tur e cayanan den bisindario, y como cu un otro partido grandi a anuncia di lo aglomera riba e mesun area di Adriaan Lacle Blvd, a pone cu AVP a bay sondea otro opcion. Esaki pa yuda facilita e trabou di Polis pa asina garantisa siguridad di cada ciudadano. “Nos a haci esaki, pasobra e ta un celebracion, fiesta, di democracia di nos pais,” Eman a enfatisa.

Pa e motibo ey a dicidi di realoca e luga di salida di AVP, e partido di mas grandi, pa ‘Veld di Cricket’ riba Vondellaan. Aunke cu ‘Veld di Cricket’ ta un distancia mas largo compara cu otro partidonan ta sali for di dje, e ta mas adecua pa AVP, particularmente mirando e cantidad grandi di sostenedonan cu semper ta compaña e partido berde entrega su lista. “Cu e sitio aki nos ta sinti cu nos tin e espacio necesario pa e miles di persona cu nos ta spera cu lo compaña nos pa entrega di e lista victorioso di eleccion di 22 di september, 2017,” e lider di AVP a splica. E salida ta permiti e partido y su simpatisantenan yega Censo den e ora cu nan a anuncia, dentro di loke ley ta stipula y sin stroba ningun otro partido.

Na final e lider di partido, a enfatisa, cu ningun caminda den ley ta specifica cu un partido politico mester t’ey na un ora particular. Loke si ley ta bisa ta cu mester t’ey prome cu 4’or di atardi. Conseho Electoral a dicidi di traha un schedule, cu AVP ta apoya, pero ta sinti cu e por a bay un tiki diferente, principalmente basa riba procesonan cu tabatin den pasado. Den pasado tabata consulta pa yega na orario cu ta cumpli cu expectativa di cada partido. Pero esaki ta algo tras di lomba, lider di AVP Mike Eman a splica.

AVP a scoge pa 3’or pasobra a constata cu no tin ningun otro partido programa pa e ora ey, mientras cu pa siguridad a dicidi di cambia e luga di salida pa Vondellaan, specificamente riba ‘Veld di Cricket’. Eman a sigura cu AVP lo t’ey prome cu 4’or y den un periodo rasonabel pa entrega lista y no na momento cu otro partido t’ey presente na Censo. AVP ta haci tur esfuerso pa no stroba trabou di autoridadnan. “Aruba tin institutonan den cua por tin hopi confiansa y a pesar di temanan cu a bin den discusion ultimo dianan, e ta kere cu esaki ta debi na pensamento di kier haci algo nobo. Pero nos ta kere cu mester facilita e expresion di apoyo cu simpatisantenan kier haci na e partido cu nan ta kere den dje.”

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio