Oranjestad, Aruba: ” E honor y orguyo di mas grandi di un hende cu ta stima futbol, ta pa contribui na e desaroyo di e futbol y asina guia y prepara e proximo genaracion pa tuma over y sigi cu e trabao positivo cu a wordo inicia. Mi a experiencia esaki serca e dirigentenan cu a inverti conosemento y pratica den mi persona desde mucha chikito te na e edad avansa.
Pa logra esaki, mi a postula mi mes un biaha mas pa sigi den e directiva ehecutivo di AVB y awor postulando mi mes como e proximo presidente di AVB.” sr Kurt Thomas ta splika. Cu miranan jen di orguyo y cu siguransa di logra e meta di hiba e futbol di Aruba na e proximo nivel, sr. Thomas ta amplia den un resumen cortico e planesnan pa logra esaki.
E directiva ehecutivo, incluso e presidente, di AVB ta wordo escohi como autoridad maximo pa representa futbol en general na Aruba. E directiva di AVB ta sali na vanguardia y juda duna sosten y conosemento na un y tur cu asocia cu AVB na Aruba, en especial su Club Miembronan.
Aki AVB ta hunga un rol importante di duna e sosten necesario hasiendo uso di su contactonan internacional y local. E sosten mester inclui conosemente, material di practica necesario y guia na tur Club Miembro di Aruba.
Rinus Michels: “Totaal Voetbal”
E maestro arkitecto di futbol hulandes
” Si bo kier hisa e nivel di e futbolista elite, bo mester hisa e nivel di e futbolista comun y coriente.”
Andy Hargreaves: “Uplifting Leadership”
Ta un investigador renombra internacional cual expertisio ta inclui “leadership” den educacion.
” Pa subi e nivel di prestacion, bo mester subi e nivel di e dirigentenan, di e organisacionan, ekiponan, entrenadornan, hungadornan y e comunidad (deportivo) en general.”
Hopi importante ta:
Mester duna sosten general na e desaroyo di AVB pa asina e programanan tecnico y di desaroyo
por tin un bon fundeshi pa produci e resultadonan general deseabel. AVB na su turno tin cu duna sosten na e Club Miembronan pa nan por juda realisa e desaroyo di e futbol.
Kurt Thomas: “Let’s make it happen: let’s enjoy the game.”
“E plan cu mi lo presenta no ta dimi so pero di henter e comunidad di futbol cu mi ta representa. E ta e resultado di mi investigacionan den e periodo prome y como miembro di e directiva ehecutivo di AVB “.
Den e cuater añan cu mi a forma parti di e directiva ehecutivo mi a siña hopi y mi ta desea
di hiba e prestigioso organisacion di AVB na un nivel mas halto.
Mi estudio di matematica y informatica y especialmente experiencia y investigacionan y preparacion prome cu mi a drenta den e directiva di AVB a judami hopi pa mi por tuma e paso aki.
AKI TA SIGI UN PIDA CHIKITO DI E PLAN.
Vision general di futbol na Aruba
Promove y organisa e deporte di futbol den tur sorto y forma pa tur hende
por gosa sanamente di e deporte na Aruba
Mision general di futbol na Aruba
Practica e deporte di futbol den tur sorto y forma na un manera competitivo y/of recreativo
pa e desaroyo fisico y mental, hasiendo e deporte accesibel pa
participacion general di e pueblo di Aruba.
Vision specifico organisatorio na nivel competitivo
Escohe structural- y realisticamente e bon direccion pa e mehoracion
di Aruba su futbol na nivel nacional y internacional
Mision specifico organisatorio na nivel competitivo
Investiga, planifica, organisa y realisa nos metanan pa realisa e vision
menciona aki riba nivel nacional como preparacion pa logra metanan na nivel internacional
Aki AVB mester investiga, analisa, juda, sostene, conseha y guia clubnan miembro pa asina nos tur como un comunidad logra nos metanan cu nos a palabra HUNTO.
Asina nos ta logra forma e fundeshi di mas fuerte conhuntamente door di crea:
- Un EKIPO
- Un FAMIA
- Un ARUBA
- Un FUTBOL
E desaroyo aki nos mester hasi bira realidad pa nos por avansa cada bes na un etapa/nivel aun mas halto structural- y consistentemente.
E futbol na Aruba no ta di un hende so, un grupito di hende y/of un instancia so pero di tur e participanten/actornan cual ta directiva di AVB, jungador, referi, entrenador, dirigente, fanaticada, stakeholders, partners y e pueblo di Aruba en general.
Conclusionan general
- E team/directiva completo di AVB ta hañando reconosemento internacional pa e direccion cu e kier bai
- AVB a cuminsa cumpli cu “Club License” cu su miembronan
- E playoff nan den division di Honor a cuminsa cana bon;
mester amplia esaki pa e otro divisionan
AVB mester:
- cambia su manera di opera; no por sigi manera cu e maneho actual
- drecha e mal imagen cu ta existi awor ariba cierto areanan
- drecha su administracion di organisacion di e diferente campeonatonan
- trata su mesun directiva, club miembronan, stakeholders y partners mas mihor
- promove mas Teamwork pa su mes
- dirigi y maneha futbol na Aruba door di ful e directiva di AVB y no solamente door di 3 hende so
- inova su maneho pa cumpli cu tur e rekisitonan internacional
- zorg pa paga un y tur na tempo
- planifica na tempo y mas mihor
- comunica mas mihor cu e Club Miembronan
- juda e Club Miembronan cu e materialnan necesario pa practica e deporte
- explora e posibilidad pa traha cu e “soccer academies” nan existente na Aruba
Majoria Club Miembro ta trese padilanti cu AVB no a judanan den casi nada.
Sugerencia, recomendacion y solucionan pa mehoracion (pa menciona un par)
* Nivel di organisacion di directiva di AVB
- Crea cu un vision cla y un planificacion di largo termino
- Hiba un maneho transparente, positivo, structura y compliendo cu reglanan di bon gobernacion y cu tur reglamentario existente di AVB mes
- Cumpli cu e exigencianan di FIFA, CONCACAF, CFU, KNVB etc
- Defini e responsibilidadnan y structura di AVB mas cla
- Zorg pa cumpli cu su compromisonan
- Promove un mihor comunicacion cu AVB su stakeholders
- Juda tur Club Miembro cu nan organisacion y conseho pa cu nan infrastructura
- Crea un structura tecnico y di desaroyo di un filosfia futbolistico pa AVB
- Instala e diferente comisionan pa juda carga e organisacion di e futbol completo
- Juda e referinan organisa nan mes
- Instala un departamento huridico cu e conosemento necesario pa juda nos den e area aki
- Ehecuta e plan di comunicacion cu a wordo traha pa AVB door di KNVB na 2014
- Organisa un congreso anual unda tur Club Miembro por intercambia idea cu AVB
* Nivel pa atrae projectonan internacional pa Aruba
- Hasi uso di e projecto pilotonan di FIFA y CONCACAF pa wordo realisa aki na Aruba
- Purba di atrae competecianan di futbol internacional , masculino y femenino, na Aruba
- ODP: Olympic Development Program
* Nivel organisatorio di Club Miembro:
Juda tur Club Miembro
- Diseña un plan di desaroyo specifico y strategico pa nan situacion
– Traha un analisis actual (IRSA) di e Club
– Wak den ki divisionan e Club ta participando
– Calcula e inversion necesario e Club mester
– Haña y projecta un bista financiero
– Defini Vision y Mision
– Defini metanan a corto, medio y termino largo - Implementa e plan, organisa y siña e club administra esaki
- Monitoria y analisa e situacion di Club Miembro
- Conclui a base di data colecta e desaroyo
- Ripiti stap 1 te cu 4 den un ciclo di 2 aña.
* Nivel di capital humano
- Inverti den un staf profesional cu mester fungi como e sosten pa operacionnnan di AVB
- Inverti dunando cursonan necesario na dirigente, entrenador, atleta y referi
- Prepara nos hendenan y sondea posibilidadnan pa participacion di e capital humano aki na eventonan internacional
* Nivel di Educacion pa dirigente, entrenador, atleta y referi:
Bin cu un “player, coaching, referee and directors of board education system”
- Crea un mision y vision
- Crea metanan
- Crea un maneho
- Crea un curiculo/structura di desaroyo di termino corto, medio y largo
- Crea guia di nivel halto pa desaroya e futbolista nan
(Duna conosemento y informacion na e entrenadornan actual)
* Nivel di educacion y organisacion futbolistico
- Promove futbol escolar pa asina haña mas participante den nos futbol local
- Hisa e participacion di futbol femenino
- Hisa e participacion di futbol infantil
- Implementa un plan pa e categoria infantil y hubenil (mucha homber y mucha muher)
preparando e futbolista pa e coneccion internacional - Implementa un sistema pa reconose y un plan pa guia talentonan
- Cuminsa activa e seleccionan nacional via un trajectoria di pratica termino largo
- Hasi e campeonatonan mas fuerte door di cambia e formato na benificio di e Clubnan
- Buska sosten financiero pa e desaroyo aki
* Nivel di finansas
- Hiba un maneho finaciero mas controla, realistico y transparente
- Crea un reserva pa den caso di urgencia cumpli cu e exigencianan financiero
- Cumpli cu e exigencianan di FIFA y CONCACAF na tempo pa haña e fondonan
financiero na tempo pa cumpli cu e pagonan necesario
* Nivel di mercadeo pa AVB
- Investiga diferente posibilidadnan pa genera mas entrada pa AVB
- Implementa e sistema di “Branding” rond di veld pa genera mas entrada
- Duna mas “exposure” den tur media pa promove futbol mas na e publico en general
- Investiga realisticamente e reintroducion di e bunita projecto
“Season Card” na un prijs rasonabel
- Atrae mas audiencia pa bin wak e wega nan di futbol door di hasi mas propaganda
* Uso di technologia electronico pa:
- automatisa diferente proceso laboral
- hasi e conosemento di futbol mas accesibel
- analisa y raporta mas liher resultado di diferente evento
Ami Kurt Thomas como president di AVB lo promove:
- Juda tur Club Miembro;
- Hiba un maneho transparente y sano;
- No ser individualista;
- No ser arogante;
- Tuma conseho di un y tur y purba di incorpora esaki serca e directiva
y den e maneho di AVB; - Promove e deporte di futbol pa desaroya e ser humano positivamente;
y siñe abilidnan “life skills” pa e por ta un bon ehempel y duna realse no solamente como un bon atleta pero tambe como un bon ser humano/cuiddadano den nos comunidad.
- Drecha e imagen negativo cu AVB tin actual;
- Promove y mantene e integridad, norma y valornan halto di y den nos organisacion;
- Promove e union entre directiva y tur Club Miembro, stakeholders y partners den e comunidad di futbol na Aruba;
- Reestablece, promove y mantene e bon contactonan local;
- Mantene y promove e bon contacto cu FIFA, CONCACAF, CFU y KNVB;
- Acerca instancianan financiero y di comercio pa asina explora e posibilidad y presenta un bon plan pa judansa y stimula inversion den e futbol na Aruba;
- Pone hopi enfasis ariba e desaroyo di nos muchanan, mucha muher y mucha homber, pa nan por jega na e nivel internacional di entrenamiento implementando un bon ” Grassroot y Youth development soccer program”;
- Usa technologia electronico como instrumento pa e desaroyo di futbol.