ORANJESTAD, Aruba: “Un di e logronan di mas grandi ta e reconocimento cu AVB y mi persona a haya di CONCACAF y FIFA durante e ultimo 4 añanan. Tambe e hecho cu despues di 30 aa a logra pasa futbol infantil bou di AVB”, asina Ing. Richard Dijkhoff, e actual Presidente di Arubaanse Voetbal Bond a duna di conoce, considerando ambos como un logro grandi den tur locual el a haci. Alabes bou di liderazgo di ing. Richard Dijkhoff, a logra pone futbol bek den boca di pueblo.
Nunca antes AVB tabatin un asina bon relacion di confiansa y di trabou cu CONCACAF y FIFA! Proximo 4 añanan mester intensiva e bon relacion aki y busca mas beneficio y adelanto pa nos miembronan y futbol en general! Muestra di esaki ta e nombracion di ing. Richard Dijkhoff den diferente comision di FIFA, CONCACAF y CFU. Alabes e.o. e placa cu CONCACAF a pone den e bombionan pa yuda iluminacion di e veldnan di e diferente teamnan ultimo!
Banda di e bon relacion di confiansa y trabou aki e Presidente actual, ing. Richard Dijkhoff a inicia y drecha e organisacion y e structura interno di AVB. Mientras cu FIFA a bin cu mas exigencia pa su miembronan rond mundo, AVB tambe mester a keda den paso di e cambionan cu FIFA a impone! E organisacion financiero interno a wordo mehora y den esaki Plus Accountant a traha ariba e mehoracion y structura cu esaki ta cuadra cu e exigencianan di FIFA. Sin aprobacion y control di un accountant externo y un bon organisacion, FIFA no ta aproba fondonan pa AVB.
Ing. Richard Dijkhoff como Presidente a logra pa futbol infantil cu tawata resorta bou di LIFIDA bolbe bek bou responsabilidad di AVB. Alabes a renoba y amplia e espacio di oficina di AVB na Shaba, pa asina por ubica e diferente personanan cu dentro di poco lo mester wordo tuma den servicio. Entre otro lo tin vacaturanan pa un Competitiemanager, un Financial Manager, un Marketing-/PR manager y un Secretario General nobo!
Ta den negociacion cu Lotto y Minister di Deporte pa e maneho y uzo di e facilidad y stadion nobo na Jara. Alabes ta implementando un programa nobo di comunicacion entre AVB y tur su miembronan pa traha digital y “online’ den registra, archiva y comunica cu e teamnan den forma mas eficiente! Ora keda cla any time e teamnan por ‘log in’ den e sistema y busca informacion of comunica cu Avb. Cursonan di referee pa upgrading y refereenan nobo lo sigui mescos cu e diferente cursonan manera ‘World coaches’, management etc.
Na nivel di CONCACAF/FIFA lo busca mas recurso financiero den e programanan pa actualisa e veldnan di bala! FIFA manera su Presidente a anuncia, lo ta dispuesto pa duna mas placa pa asina mas team yega na nan veld di turf/yerba artificial! Esaki ta programa pa e añanan venidero!
AVB ultimo añanan a inicia cu implementacion di e programa di licencia (Clublicenses) y lo sigui duna apoyo y yuda mas team pa cumpli e licencia cu tambe ta un exigencia di CONCACAF/FIFA!
Tanto Victor Montagliani, President di CONCACAF como Gianni Infantino cu ta e Presidente di FIFA, tin gran aprecio pa ing. Richard Dijkhoff y ta considera Aruba un partner strategico den Caribe! Muestra di esaki y e confiansa cu nan tin den ing. Richard Dijkhoff ta momento cu a tuma e decision pa tene e congreso di CONCACAF na april ultimo akinan, pa prome biaha den historia! Tanto e Presidente di CONCACAf como esun di FIFA a destaca nan confiansa den ing. Richard Dijkhoff, AVB y Aruba como un partner importante pa e desaroyo di futbol den Caribe!
Ing. Richard Dijkhoff ta conta cu e apoyo y confiansa na nivel internacional y awor ta keda na AVB pa den e proximo 4 aña sigui haci e bon trabou y mantene e bon relacion di confiansa y trabou cu Richard Dijkhoff a logra! Richard Dijkhoff ta cla pa sigui traha 4 aña mas pa futbol di Aruba!