Home Uncategorized Carta habri na sr. Mike Eman BAN DEMOSTRA SERIEDAD Y RESPONSABILIDAD...

Carta habri na sr. Mike Eman BAN DEMOSTRA SERIEDAD Y RESPONSABILIDAD DEN E ELECCION AKI

SHARE

Cu asombro, y sinceramente cu hopi berguensa, mi a tuma nota di e actitud di partido AVP y su lider sr. Mike Eman relaciona cu e entregamento di lista.

Conseho Electoral, mescos cu cada eleccion, hasiendo uso di e espacio cu ley ta dun’e, a stipula e orario cu cada partido politico lo entrega su lista. Mescos cu cada eleccion, algun partido ta content cu e orario, mientras otro partido no ta contento cu e orario. Sinembargo, tur partido politico den pasado a cumpli cu e stipulacionnan di Conseho Electoral.

Conseho Electoral ta stipula diferente orario pa asina e entregamento di lista bai na forma ordena. Den cada pais autoridadnan electoral ta trata di organisa e eleccion mas ordena y civico cu ta posibel, y ta pa e motibo ey cu partido MEP ta sostene Conseho Electoral den esaki.

MEP mester entrega e lista entre 1.30 y 2.00 pm, y nos ta hasiendo tur preparacion pa nos yega Censo (Stadhuis) 1.30 pa duna Conseho Electoral tempo pa revisa e lista dentro di e tempo stipula.

 

Mi ta lamenta profundamente cu net sr. Mike Eman cu ainda ta minister presidente di nos pais, y cu ta lider di e partido cu tabata esun mas grandi eleccion anterior, ta demostra un actitud di desobediencia y rebeldia infantil, cu no ta beneficia Aruba, ni su partido. Di e minister presidente di nos pais, alabes esun encarga cu mantene orden publico, nos pueblo a spera net contrario.

 

Aruba lo sali mihor beneficia si tur partido tene su mes na e reglanan di Conseho Electoral, y ta pa e motibo ey mi ta hasi un apelacion fuerte riba sr. Mike Eman, y riba partido AVP pa recapacita y atene su mes na reglanan stipula pa Conseho Electoral y entrega e lista di AVP 10.30 am.

 

Ban demosta seriedad y responsabilidad, y ban evita confrontacion inecesario den e eleccion aki. Ban mustra mundo henter, pero sigur Reino Hulandes, cu Aruba por carga su responsabilidad democratico y electoral na forma madura, manera ta wordo spera di un pais autonomo pa 31 aña.

 

Atentamente

Evelyn Wever-Croes

Lider di MEP