Home » Prome Minister Mike Eman “Danki na Seventh Day Adventist Church pa ta un institucion asina special den nos comunidad”

Prome Minister Mike Eman “Danki na Seventh Day Adventist Church pa ta un institucion asina special den nos comunidad”

by sxm
0 comment 120 views

ORANJESTAD – “Hunto cu un edificio renoba, tambe nos ta haya un fe renoba y un proposito renoba,” esey tabata parti di e palabranan cu Prome Minister Mike Eman a dirigi na e congregacion di Seventh Day Adventist Church na San Nicolas. Diabierna anochi, lider di Pais Aruba tabata invitado di honor pa corta cinta y asina declara e edificio di e iglesia oficialmente habri, despues di e proceso di renobacion cu a caba di culmina.

E ceremonia a conta cu presencia di figuranan grandi di religion na Aruba y den nos region, manera Pastor Shurman Kook President di e Dutch Caribbean Union y Pastor Israel Leito President di Interamerican Division kendenan tambe a corta cinta hunto cu Prome Minister. Parlamentarionan Lorna Varlack, Chris Dammers y tambe Marlon Sneek a asisti na e celebracion.

“Mi ta spera cu ora nos bini hunto aki y despues bay cas awenochi, cu e spirito di renovacion den e Seventh Day Adventist Church tambe lo laga un sinti renoba di compromiso pa cu nos prohimo,” asina Premier Eman a bisa na e congregacion como parti di e bon bini oficial na e Iglesia renoba. Eman: “Nos ta mes bon como comunidad, cu ta nos relacion cu otro. Tin un dicho ta bisa cu un hende ta bira hende solamente dor di e relacion cu e tin cu otro.” Den e relacion ey no por mustra amor y afecto, nos por mustra tristeza den temponan dificil of nos por mustra entusiasmo cu e éxito di nos amigo, bisiña y famianan, segun Eman.

Finalmente, Minister President Mike Eman a gradici liderazgo y miembronan di e Seventh Day Adventist Church cu ta existi na Aruba desde 1930 ora cu a cuminsa bini hunto den Village, y pa 1955 a bira asina grandi, cu a inaugura nan edificio den Dr. Schaepmanstraat. “E iglesia a haci asina hopi pa e comunidad Arubiano. Nan a trece luz den asina hopi curazon y duna speransa na hopi otro. A duna un man den momentonan di desesperacion, tristeza y necesidad, hayando akinan e consuelo y motivacion pa continua cu nan bida y afronta futuro.”

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio