Home Uncategorized MEP: PA CADA CANDIDATO CU SUBI LISTA DI MEP, BIENESTAR DI ARUBA...

MEP: PA CADA CANDIDATO CU SUBI LISTA DI MEP, BIENESTAR DI ARUBA TA PRIORIDIDAD

SHARE

Durante nos magno evento Klip P’e Cambio diabierna 28 di juli, partido MEP a presenta e cuarto candidatonan cu a wordo lansa den e ultimo simannan riba nos lista victorioso.

Dilanti un publico grandi y entusiasma, lider di MEP, sra Evelyn Wever-Croes a presenta e 4 candidatonan aki, kendenan a wordo yama bonbini cu grito y aplauso pa e publico presente.

 

CARLOS JACOBS:

Pa hopi aña, Carlos a traha den ambos e mundo politico y esun gubernamental y a apoya otronan den haci e trabou vigente.

Awo, Carlos a dicidi di uni su mes na Partido MEP pa asina yuda delinea y ehecuta proyectonan importante cu tin prepara pa nos isla.

Carlos a dicidi di uni su mes riba lista di MEP pasobra e ta convenci cu Partido MEP lo haci e diferencia den e bida di tur cu ta biba na Aruba cu plannan innovativo, productivo y sin propio interes.

 

SUE-ANN RAS:

Un docente cu hopi pasion den enseñansa y den nos idioma Papiamento. Enseñansa tin diferente retonan y mester bin cambio pa mehoracion rapido, p’asina por desaroya cada un su potencial. Pa e motivo aki Sue Ann ta cla y a tuma e reto di forma parti di e partido MEP.

Mision di Sue Ann como politico ta pa hunto mantene un rol di liderazgo den e generacion aki, unda nos ta sostene y promove desaroyo academico, economico y social, mediante un enseñansa mas efectivo. Hunto cu sosten y confianza di partido y pueblo, Sue Ann kier promove logro exitoso di cada studiante y brinda nan un preparacion di competencia global, door di fomenta excelencia den educacion.

 

ROCCO TJON:

Rocco Tjon no tabata presente e anochi aki, debi na compromiso for di nos pais, sinembargo el a wordo presenta cu un video cu a wordo prepara pa e anochi.  

Rocco tin 16 aña di experiencia den e ramo di husticia. El a sirbi Aruba, prome como polis, caminda e ultimo funcion cu el a eherce den KPA tabata esun di chief of staf. Tambe el a sirbi como director na KIA y a pasa den ‘screenings’ riguroso pa por a ocupa e funcionnan aki.

Rocco a subi riba lista di MEP pasobra e ta convenci cu e team di MEP tin e candidatonan cu experiencia y dedicacion, pa enfrenta e retonan difícil di nos país y cu experiencia no solamente politico, pero experiencia operacional den cada area y riba nivel strategico. Definitivamente un team di candidato bon studia y talentoso, cu hunto lo trece solucion y contribui na un miho Aruba.

 

EDDY PARIS:

Un professional pa mas di 20 aña trahando den e sector corporativo, bancario-financiero.

Hustamente den su carera professional, Eddy a bin realisa di cerca e falta di disciplina financiero di parti di nos gobierno, particularmente e ultimo añanan, y e consequencianan serio pa nos economia. E situacion financiero economico di nos pais ta sumamente alarmante. 

Pa e motibo aki, Eddy a dicidi di drenta politica, teniendo e discplina y integridad rekeri pa hunto cu e team di MEP, haci e cambionan cu ta urgentemente necesario.

 

 

Cu e candidatonan aki hunto cu demas candidatonan di MEP, nos ta ofrece un lista cu e liderasgo nobo cu Aruba merece. Hunto nos lo bay pa e cambio cu Aruba ta pidi pe. 22 di september, deposita bo confiansa den Partido MEP y permiti e ekipo aki traha na bienestar di e comunidad.