Home Uncategorized Parlamentario mr. Juan Ady Thijsen (MEP): MEP lo introduci un stimulus package...

Parlamentario mr. Juan Ady Thijsen (MEP): MEP lo introduci un stimulus package special pa rebiba nos comercio local y crea comercio nobo.

SHARE

Parlamentario mr. Juan Ady Thijsen ta consciente cu comercio di Aruba a sufri hopi e ultimo anjanan. Gobierno di AVP no a percura pa un ambiente unda comercio por florece. Alcontrario gobierno di AVP mes a bira un obstaculo grandi den caminda cu entre otro trafico pega cu camindanan kibra pero principalmente no tabata tin poder di compra y plaka no ta lora. Asina ta hopi negoshi tin cu a cera y otronan ta lucha pa sobrevivi. Ariba dje Departamento di Impuesto ta riba nan pa cobranza.

Parlamentario mr. Juan Ady Thijsen ta kere cu un y tur ta di acuerdo cu e situacion no por sigui asina y cu un mester cambio. Den e cuadra aki partido MEP lo introduci un stimulus package conteniendo varios forma di apoyo pa e comercio actual por rebiba y alavaz crea comercio nobo.
Punto di salida: Mescos Aruba mester di e clase trahado tambe Aruba mester di comercio. Aruba mester su comercio rebiba pero tambe un generacion nobo di comerciantenan local. E personanan aki por bin di studiantenan cu ta caba scol, trahado cu bon idea y kier purba den negoshi, tambe funcionarionan publico cu kier purba cu negoshi y claro nos hendenan cu ta biba den exterior y kier bin bek Aruba. Den cuadra di esaki ta ser pensa riba lo siguiente:

1. Mehora poder di compra. Lo principal ta mehora e poder di cumpra na Aruba, pasobra si e pueblo no por cumpra comerciantenan no por bende. Segun Parlamentario mr. Juan Ady Thijsen lo percura pa un maneho economico agresivo unda ta sigui promove desaroyo den turismo y pa e refineria pero alavez lo tin maneho dirigi pa amplia e cantidad di pilarnan economico. Tambe lo introduci cambionan den maneho di prijs pa un mihor desaroyo di e poder di compra. Parlamentario mr. Juan Ady Thijsen ta kere cu pa un bon canalisacion di e maneho pa stimula nos comercio ta importante pa tin un bon planning di kiko ta bai haci y con. Departamento di Asuntonan Economico ta bai hunga un rol central den esaki.

2. Elimina Burocracia: Ta conoce cu entre e momento cu bo dicidi habri un negoshi te cu bo habri bo negoshi realmente y ricibi bo prome cliente ta dura hopi y bo mester pasa den diferente procedura tanto di gobierno pero tambe otro instancianan semi gubernamental y tambe bo mester di sector priva manera ora di habri un cuenta di banco. Parlamentario mr. Juan Ady Thijsen ta kere mester bin mehoracion di esaki, no necesariamente one window ya cu cada instancia tin su exigencianan. E dunamento di informacion si por ta central.

3. Baha gasto di utilidadnan. Mescos cu e cuidadano comercio tambe ta sufri di gastonan halto di utilidadnan pesey gobierno mester traha riba baha gastonan di utilidadnan pa un y tur pues tambe pa comercio.

4. Asistencia Administrativo. Ta conoci cu hopi comerciante local tin fayonan basico den administracion di empresa mientras un bon administracion sigur lo contribui na un miho maneho di empresa. Gobierno nobo lo hiba un campanja informativo riba esaki y na unda por lo accentua esaki den proceduranan cu gobierno.

5. Financiamento. E bottleneck pa hopi empresa hopi biaha ta e finanzas pa cuminsa. Hopi hende tin bon idea di negoshi pero no tin e placa. Segun Parlamentario mr. Juan Ady Thijsen akinan e gobierno nobo lo mester ta frontrunner pa pusha pa start up loans wordo ofreci. Banconan local por participa den esaki, AIB bank y tambe lo lanta un banco di Desaroyo specialmente pa start up loans pa nos comerciantenan local existente y nobonan.

6. Cambionan den peso Fiscal. Ta conoci cu Aruba ta number uno na mundo pa obligacionan fiscal y esey claro no ta stimula un persona pa lanta negoshi. Parlamentario mr. Juan Ady Thijsen ta kere cu mester baha for di lomba di tanto trahado como comercio. Gobierno lo haya su fairshare for di entre otro e BBO. Den cuadra aki tambe gobierno lo mester crea diferente incentiva fiscal pa stimula e comercio.

7. Mehora proceduranan bancario. Parlamentario mr. Juan Ady Thijsen ta compronde cu tin actualmente varios obstaculo den nos banking sistem ora habri un cuenta bancario y tambe transaccion local y internacional no ta bai of no ta bai mes facil cu porehemplo na Merca. Claro esaki sigur ta obstaculisa continuidad di un negoshi y lo mester ser mehora.

8. Criminalidad y ambulantenan. A pasa mientras tanto 8 anja cu a priminti di combati criminalidad y resolve e problematica di adictonan ambulante. Parlamentario mr. Juan Ady Thijsen ta kere cu resolve e problemanan aki ta un prioriridad di un siguiente gobierno. Ningun negoshi lo por florece si constantemente bo ta wordo atraca, horta of molestia.

9. Mehora Comunicacion. Un sistema di Comunicacion ta essencial den e mundo moderno aki pa cualkier empresa telefoon, fax internet y Aruba mester keda al dia cu desaroyonan tanto localmente como den comunicacion cu e resto di mundo.

10. Kita miedo pa sindicalismo Parlamentario mr. Juan Ady Thijsen ta kere cu e miedo di comercio pa cu sindicalismo mester kita. Un bon sindicalismo den bo negoshi ta contribui na mehor acuerdonan y ta trece harmonia y motivacion. Akinan tambe Parlamentario mr. Juan Ady Thijsen ta kere den studia e posibilidad di ondernemersraden manera na Hulanda.

11. Stichting van de Arbeid Parlamentario mr. Juan Ady Thijsen ta kere firmemente den un Stichting van de Arbeid na unda Donjonan di empresa y representantenan di trahado ta acorda condicionan di trabao pa un temporada mas largo.

12. Reparti Gastonan social Ta conoci cu e empresario na Aruba ta carga un peso grandi den nos structura social y esaki no ta stimula negoshi. Parlamentario mr. Juan Ady Thijsen ta kere cu den cuadra di un negociacion pa mehora e productividad laboral y introduccion di mas dia di vakantieuitkering y kindertoelage pa trahado, menos ora di trabao etc. tambe lo tin espacio pa e donjo di trabao kita poco peso di e structura social di su lomba. Den cuadra aki Parlamentario mr. Juan Ady Thijsen tin pensa riba introduccion di un landsverordening op de arbeidsproduktiviteit.

13. Mehora procedura di retiro. Manera anuncia anteriormente Parlamentario mr. Juan Ady Thijsen no ta kere den haci cambio den ley di retiro ni articulo 1613x pero si Parlamentario mr. Juan Ady Thijsen ta kere den haci e periodo di procedura di retiro via comision di retiro y Director di Labor mas cortico. Segun Parlamentario mr. Juan Ady Thijsen mester tambe mas informacion pa donjonan di trabao con pa ehecuta e procedura di retiro. Lo percura pa campanjanan di informacion.

14. Mehora parkeo y trafico. Manera ta conoci gobierno di AVP mes a bira un obstaculo grandi den caminda cu entre otro trafico pega cu camindanan kibra. A bin acerca e introduccion di Aruparking y pagamento di parkeo. Parlamentario mr. Juan Ady Thijsen ta kere cu mester yega na un solucion pa e comercio no sigui perhudica y na mesun momento mantene orden den parkeo na Aruba.

15. Apoyo internacional. Parlamentario mr. Juan Ady Thijsen ta kere cu nos comerciantenan cu ta desea di subi e mercado internacional lo mester haya full sosten di gobierno. En bes di promove negoshinan di Europa y America topa cuadra manera AVP a propaganda Parlamentario mr. Juan Ady Thijsen ta kere den promove nos negociantenan pa nan haya mercado den Europa y Amerika. Den cuadra di esaki Parlamentario mr. Juan Ady Thijsen sigur lo desaroya e posibilidadnan cu e LGO Besluit ta brinda.
Parlamentario mr. Juan Ady Thijsen ta pidi e pueblo pa sigui desaroyonan di cerca y vota consciente pa nos por desaroya e comercio di Aruba. Parlamentario mr. Juan Ady Thijsen y partido MEP ta cla pa e reto hunto sin miedo.