Home » Jacky van Putten, POR Ami no ta un number

Jacky van Putten, POR Ami no ta un number

by sxm
0 comment 90 views

Mi a dicidi di drenta politica cu e unico meta di ta parti di un cambio cu Aruba lo bay tin. Mi a mira den mi ramo con diferente ministernan a traha y mi no por para na banda mas y acepta e manera con deporte ta wordo maneha. Mi a scohe pa un partido orguyoso y respeta. Desde cu mi a uni cu e Plataforma nobo POR e prome reaccion tabata hopi positivo, pero mi a haya mi mes cada bes confronta cu “ki number bo ta?”.  Cada bes e mesun pregunta. Hopi  ta interesa den unda bo lo ta riba lista.

Personalmente mi nunca a subi riba lista cu e intencion di tin un cierto number, mi intencion tabata y ta solamente di por tin e oportunidad pa yuda mi hendenan, mi pais y e deporte. Mi kier ta den un team cu por wak e necesidadnan di un pueblo y cu lo tin un plan pa asina por haci e cambionan. Mi kier tin e oportunidad pa forma parti di un ekipo cu lo trece deporte bek den nos scolnan, nos barionan y concentra riba movecion pa cu nos hobennan y grandinan.  Number pa mi no ta importante, si esey ta un rekisito pa forma parti di un partido anto mi ta kere bo prioridadnan ta robes. Den mi opinion e number nunca mester hunga un rol den bo desicion pa un bida publico di sirbi bo comunidad. Ta di compronde cu algun partido lo confronta dificultad den forma un lista a base di numeracion di e candidatonan.

Politica mester mira un cambio na unda bo preferencia ta basa riba bo aceptacion y no depende riba un lista. Esaki a crea un stempel parlement na unda personan cu menos cu 100 voto ta sinta y dicidi riba e futuro di nos pais. Y ora bo wak riba e lista, tin varios político cu a haya hopi mas sosten di e pueblo. Esaki ta un falta di respet na e voz di pueblo, esaki ta trapa riba nos democracia electoral. Como politico of sirbido di pueblo bo no por trek bo mes ariba otronan cu a haya mas aprobacion. 

Desde cu mi a sinta y papia cu nos lidernan di partido nan a expresa  e mesun pensamento cu nos lista lo no sigui e sistema di posicion riba lista, cual ta discriminatorio y ta ofende e votador. Como partido nos lo respeta otro su resultado, nos lo apoya esnan cu e pueblo a duna mas sosten, nos lo entrega nos derecho di ley pa respet di e pueblo votador.  

Ora un politico cana den barionan, demostra su intencion y mustra su experticio  pa yuda nos isla e pueblo lo premie cu su sosten. Nan lo dicidi ken riba e lista di POR lo miho representa nan den un gobernacion proximamente. Diaranson 2 augustus como partido nos, como un partido orguyoso y respeta lo demostra nos pueblo cu nan ta esun cu lo pone esnan riba e lista den gobernacion. Nos tur lo firma  un documento na unda nos ta enterga nos derecho pa ley di nos posicion di number riba e lista.

Esun cu pueblo duna mas sosten ta esun cu lo representa nan, no importa e orden di number riba lista. Un politico cu ta respeta su mes no por subi un lista y exigi di e lider un posicion, mas ainda si e no a demostra cu e pueblo ta para su tras.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio