ORANJESTAD – Pa diabierna awor tur e cayanan di santo na San Miguel ta completamente asfalta. Habitantenan a haci un peticion na Minister di Infrastructura Benny Sevinger, pero tambe a papia cu Prome Minister Mike Eman durante su bishita den bario. A mustra cu nan tin dos prioridad: Luz pa e bario y asfalt pa camindanan. “E por parce cosnan chikito, pero pa e habitantenan nan ta importante,” Prome Minister Eman a bisa diamars ultimo ora cu el a bishita e area y mira cu enberdad DOW a cuminsa asfalta e camindanan.
Recientemente a cumpli cu e prome deseo di e habitantenan caba, ora cu ELMAR a instala puntonan di iluminacion nobo den e cayanan di San Miguel. Awor e asfalt a yega pa tur e cayanan di San Miguel. E cayanan asfalta ta tanto den e area pabou di caminda como esun banda pariba y ta pasa dilanti mas o menos 200 cas. E habitantenen no mester biba mas den e stof di tur dia.
Ing. Marlon Croes, director di DOW, a splica cu e camindanan a wordo asfalta siman pasa, mientras cu e siman aki ta haci e acabado, cu ta e banchinan na banda di e caretera. E proyecto di 250 mil florin pa asfalta e area na San Miguelo ta uno basta grandi, mas cu 10 caya y ta pasa dilanti casi 200 cas.
“Nos ta contento cu e trabounan aki ta canando basta rapido. E proyectonan ta encera menos stof, mas trankilidad pa e hendenan den e bario. Nos a haci un compromiso cu ta keda realisa pa nos hendenan. Y awe e habitantenan di San Miguel tambe ta conoce e mehoracionnan aki, den nan caya y iluminacion,” Prome Minister Eman a bisa.
Croes a bisa tambe cu pa realisa e proyectonan di asfalta caminda, a sinta na mesa cu funcionarionan di DOW y Team di Minister Sevinger, pa mira con ta hinca e lista den otro. Asina a pasa caba den barionan na San Nicolas, Cura Cabay, Savaneta, Pos Chiquito, Primavera y ta preparando pa bay Noord, Alto Vista y diferente otro bario mas. Interesante ta cu mayoria di e trabounan aki ta wordo haci door di personal di DOW mes, incluso verkeersplateau’s , cu mayoria ta wordo construi den oranan di anochi pa marduga. “Pesey mi tin cu manda un reconocimento pa e trabou di calidad y dedicacion di empleadonan di DOW cu ta realisando e proyectonan aki pa un miho calidad di bida pa nos ciudadanonan,” e mandatario a bisa.