Home » Evelyn Wever-Croes : NOS NO TA PAPIA SO, NOS TA TUMA ACCION Pasobra bo salud ta nos prioridad

Evelyn Wever-Croes : NOS NO TA PAPIA SO, NOS TA TUMA ACCION Pasobra bo salud ta nos prioridad

by sxm
0 comment 55 views

ORANJESTAD – Lider di MEP Evelyn Wever-Croes y parlamentario Ady Thijsen a reuni cu sr. Anco Ringeling y sra. Solange Tchong di AZV diamars ultimo.

Durante e reunion AZV a comparti informacion tocante e fondo y su situacion financiero. Tambe a papia di planes den e futuro cercano cu lo tin un efecto riba e fondo.

 

GOBIERNO NO TA PASA PLACA DI BAZV PA AZV

Preocupante ta cu AZV no ta haya tur e placa di BAZV di Gobierno manera mester ta. “Si gobierno ta cobra pueblo BAZV pa cuido medicoi, nan mester manda esaki pa AZV y no keda cune pa paga nan gastonan di campaña, cu ta hopi halto den e dianan aki. Nos lo manda un carta pa minister di salubridad y di finansas pa nan duna cuenta dicon nan no ta pasando e placa pa AZV.

 

MEHORA CUIDO DI SALUD

Nos a papia extensamente cu AZV di e cuido di salud actual, cu tin hopi keho den comunidad, y con por mehora esaki. Den nos vision di MEP nos kier enfoca mas riba prevencion. Un di e proyectonan di prevencion ta di inclui estilo di bida saludable den curiculum di scolnan. Y siña e muchanan desde chikito tocante remedinan di tera. Duna agricultura, cria y pesca mas prioridad den maneho di gobierno.

Nos kier bin tambe cu un chekeo medico obligatorio, pasobra esey por scapa hopi sufrimento si detecta un malesa na tempo y e ta scapa AZV hopi placa.

Especialmente ora ta trata malesanan hereditario, un chekeo asina ta necesario. Prevencion lo trese un alivio den e situacion di cuido di salud, pero riba termino largo.

 

Locual nos mester hasi riba termino corto ta corta e tempo di espera. Nos a papia extensamente di busca mas specialista pa atende cu patient, con pa stimula nos hobennan pa bai studia enfermeria y kiko mester hasi pa alarga e orario di sala di operacion y pa hasi testnan na hospital.

Den e sigiente dianan lo mi elabora mas riba e diferente solucionnan cu nos a papia cu AZV pa mehora e cuido di salud.

 

E reunion a bai bon y mi ta gradisi sr. Ringeling y sra. Tchong pa comparti e informacion cu nos. Nos no ta papia so, nos ta tuma accion, pasobra bo salud ta nos prioridad” lider di MEP Evelyn Wever-Croes a duna di conose.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio