Home Uncategorized Segun Minister Mike de Meza :Coherencia den maneho y cooperacion entre tur...

Segun Minister Mike de Meza :Coherencia den maneho y cooperacion entre tur partner A traduci den crecemento positivo y substancial den turismo Den prome mita di aña

SHARE

ORANJESTAD, Aruba: Compara cu e metemento diario di antes den e maneho di Aruba Tourism Authority y awendia cu ta duna e expertonan espacio pa nan traha y tuma nan propio decisionnan, awor ta nota cu den e prome 6 lunanan di aña ta raporta crecemento den varios area di nos industria turistico. “Nos si ta laga nan traha y mi ta sigur cu esey ta e miho formula”, asina Minister Ing. Mike de Meza a duna di conoce despues di e conferencia di prensa recientemente hunto cu directiva di ATA.

 

Ey a anuncia cu den e prome mita di aña 2017, “Tourism Receipts” a subi cu 4%, “stay-over visitors” a subi cu 5.2%, “Cruise passengers” a subi cu 2.3% y “Revenue per available room” a subi cu 5.2% si compara cu e prome 6 lunanan di aña pasa.

 

“E resultado por ta miho ainda, si exclui Venezuela afo. E ora e cantidad di turistanan cu ta keda Aruba lo a subi cu 7.6%. E retonan socioeconomico na Venezuela ta conoci y ATA ta atendiendo cun’e. Nos tabata sa tambe cu dado momento e mercado lo no sigui crece den forma desproporcional y cu e cifranan lo normalisa”, e mandatario a aclaria.

 

Comparando cu e region Caribense, nos isla ta sigui di ta un di esnan miho, cu a crece mas den e prome 6 lunanan di e aña aki, specialmente den RevPar y den cantidad di turista yegando nos isla via avion. “Esaki ta demostra atrobe cu e modelo pa tin un ATA realmente independiente ta bayendo bon y ta duna nan espacio pa haci tur lo posibel, explora tur opcionnan, pa ta mas creativo posibel, pa sigui atrae mercadonan nobo y sigura cu aerolineanan tin stoelnan disponibel pa trece mas turista pa nos isla”, di acuerdo cu e mandatario.

 

Minister Mike de Meza ta orguyoso di e resultadonan, tambe di partnernan strategico manera AHATA y Aruba Airport Authority. Hunto lo logra alcansa e meta di crecemento cu a fiha pa e aña aki.