Enseñansa ta hopi mas cu djis inverti den renobacion y construccion di edificio y awo ta yega momento pa realmente pa haci un inventarisacion y analisa con nos por mehora e calidad di enseñansa den su totalidad. Desde aña 2000 a registra un enorme progreso den e meta relativo di educacion primaria universal. Na Aruba nos ta carece di cierto informacion basa riba investigacion concreto, pa analisa e situacion real. E meta pa logra un educacion di calidad pa tur, ta basa den e conviccion cu educacion ta un di e motornan mas poderoso y proba pa garantisa un desaroyo berdaderamente sostenibel.
Maneho di idioma cu ta relevante pa Aruba. No tin duda cu idioma ta algo bibo den un pais y mundialmente ta comproba cu un mucha ta siña miho den su idioma materno. UNESCO incluso ta boga pa esaki y actualmente na Aruba tin 2 scol cu e sistema curicular di scol multilingual, unda cu a demostra cu nos muchanan tin un resultado significativamente miho, specialmente riba e area emocional.
Papiamento ta un fundeshi sumamente importante y nos no mester pensa, cu introduciendo Papiamento den enseñansa, ta un menasa pa idioma Hulandes. E mitonan tocante cu; Papiamento NO ta un idioma of cu Papiamento bo no ta yega leu toch, no ta berdad! Papiamento ta un idioma y net contrario, Papiamento si por yuda nos muchanan yega mas leu cu idioma Hulandes y cualkier otro idioma.
Ta cientificamente comproba y UNESCO ta para completamente tras di esaki, cu: si un mucha desaroya su idioma materno riba nivel academico, e por siña cualkier otro idioma, uzando su idioma materno como su base. E problematica di idioma na Aruba, ta hopi mas grandi cu nos ta pensa y nos tin e solucion nos dilanti. Nos mester djis kere y confia den loke ta cientificamente y empiricamente comproba y loke ta miho pa tur nos muchananan. Djey nos mester brinda nan e espacio realmente pa desaroya tur nan potencialnan. No tin dato concreto ni investigacion tocante cuanto mucha ta faya den enseñansa, pa motibo di e idioma. Pero mi por garantisa boso, for di experiencia, cu hopi alumno ta na un nivel di scol actual, cu no ta door di nan inteligencia of capacidad, sino cu e problema cu idioma cu nan a encontra.
Si realmente nos kier mira un desaroyo positivo y exitoso den enseñansa, nos mester brinda nos muchanan e oportunidad pa nan por florece y siña nan idioma materno riba un nivel academico y no limita nan oportunidad, door di pensa cu nos ta stroba otro idioma of cu nan no ta yega leu cu nos idioma Papiamento.
Djis pa mi cita 1 ehempel: Pa 2 aña consecutivo, e miho graduadonan na nos scol secundario Filomena College Mavo, ta alumno cu a bin for di Prins Bernard School. Nan a haya pa 1 of 2 aña les di idioma Hulandes, di cual e alumnonan aki ta uza nan base di idioma materno pa siña Hulandes riba nivel academico. Ambos alumno ta scoge ‘exact pakket’ den examen klas y ta logra resultado sumamente positivo. Idioma ta algo bibo y continuamente ta den desaroyo y nos mester crea un desaroyo cu ta complimenta e necesidadnan di nos presente, sin compromete e habilidad di nos futuro generacion pa nan complementa nan propio necesidad.