ORANJESTAD, Aruba: Robert Candelaria a conta diasabra mainta durante un programa bibo na Canal 90FM, cu no tabata un decision facil pa el a dicidi pa muda cu su famia bek pa Aruba y cuminsa un carera politico. E tin un amplio experencia tanto den Cuerpo Policial Aruba como tambe den sector priva na Aruba y na Corsou. Despues di conta cu experencia gubernamental y sector priva, awo e ta sinti cu e ta cla pa por duna bek na comunidad.
“Den e area politico Bo tin mas instrumento, mas forma cu Bo por nifica algo pa Bo comunidad. Cada decision cu Bo tuma, cada accion cu Bo tuma tin hopi implicacion y nificacion. Ora Bo tuma nan corecto, segun conseho, Bo por haci cambionan grandi”, asina Robert Candelaria a duna di conoce.
Cu e conocemento cu e tin awor riba e area di siguridad y husticia, e ta convenci cu e caminda ta largo. Specialmente e ultimo dianan aki ta nota con autoridadnan ta gara un cas cu casi 50 hende bibando indocumenta eyden. E ta un ehempel bibo con nos mesun hendenan ta yuda criminalidad, nan mes ta facilita pa e tipo di cosnan asina por sosode, nan mes ta yuda burla di nos leynan, duna e hendenan aki auto y cas pa biba. Ta e mesun hendenan ey despues ta keha cu criminalidad ta halto, lubidando cu nan mes ta parti di henter e cadena di crimen. Pues, cu e realidad aki por nota cu e caminda pa soluciona e problema aki ta pa cuminsa for di su rais!
E ex Alto Inspector di Cuerpo Policial Aruba a splica cu den su trayecto, specialmente den e departamento hudicial di Polis (Recherche), a conoce hopi situacionnan y a mira con famianan a kibra for di otro, netamente pa motibo di a bay dedica tempo na criminalidad. E ta sinti cu informacion ta crucial, pa tur hende ta miho consciente di e consecuencianan cu e mundo aki ta bin cune.
Relaciona cu castigonan impone, el a splica, despues cu a puntr’e dicon castigonan ta asina abou pa algun delito, el a aclaria cu Polis no ta traha pa duna castigo. Aunke cu e ta consciente cu pueblo ta midi Bo na final riba castigo cu e sospechoso haya. Ta pesey e ta convenci cu Ministerio Publico mester duna Polisnan e hermentnan necesario pa por presenta miho casonan padilanti, pa e sospechosonan haya mas castigo, pa pueblo por haya e impresion cu husticia a prevalece.
Mester menciona cu a drenta hopi pregunta via telefon y via red social. E forma sakseno y trankilo, sin ningun emocion y cu un sentido halto di profesionalismo cu e tabata contesta, ta subraya e motibo di su entrada den politica: Pa reenforsa e ekipo den partido cu ta atende cu temanan di husticia y siguridad. E trabou ta haci caba, awor ta pa sigui traha duro pa tur dia, haci nos isla mas sigur ainda.