Home » Atalo Winklaar 30 aña y Caroline Peterson 25 aña di servicio Cuerpo Policial a celebra 55 aña di trabou cu hubilarionan

Atalo Winklaar 30 aña y Caroline Peterson 25 aña di servicio Cuerpo Policial a celebra 55 aña di trabou cu hubilarionan

by sxm
0 comment 65 views

ORANJESTAD, Aruba: Diahuebs ultimo Polis di “Bureau Interne Zaken en Onderzoek” (BIZO), esta Atalo Winklaar y “Recherche assistent” na Recherche Santa Cruz, Caroline Peterson di Cuerpo Policial Aruba a ricibi nan decreto gubernamental. Peterson a cumpli 25 aña di servicio y Winklaar tin 30 aña di servicio. Cuerpo Policial a celebra cu e hubilarionan hunto cu nan famia.

 

Alto Comisario di Polis, mr. Adolfo “Dolfi” Richardson a indica cu e trabou di Polis ta complica y el a gradici e famianan pa duna e agentenan e sosten necesario. Cuerpo Policial ta consisti di hopi agentenan hoben y semper Alto Comisario Richardson ta haci apelacion na esunnan cu mas experiencia pa duna e guia necesario na e hobennan.

 

E trayecto di Atalo Winklaar a cuminsa na aña 1980 ora el a cuminsa e opleiding di Polis. Na 1982 el a cuminsa traha na San Nicolas y poco poco Atalo Winklaar a crece den su posicion. El a bay traha den departamento di Recherche na 1984 te cu 1992 y pa 1993 Atalo Winklaar a bay traha den departamento di Strand Politie te cu 1996. Despues el a sali for di Polis y a bay traha den sector priva pa 6 aña, unda Atalo Winklaar tabata hefe di siguridad na un Casino.

 

Na aña 2003 Atalo Winklaar a regresa den Cuerpo Policial, na Strand Politie, pasobra nan a acerca su persona pidiendo pe bay bek eynan pa maneha e Visibility Team, mirando su experencia den Polis y den sector priva. El a keda traha den e departamento aki te cu 2016 y desde 2016 el a bay traha na Noord. E aña aki na luna di februari a transferi Atalo Winklaar pa BIZO.

 

“E trayectorio tabata hopi bon y mi ta sinti mi orguyoso di ta den Cuerpo Policial Aruba”, el a expresa contento. Agente Winklaar ta haya cu nan ta ricibi un bon trato. E conseho cu el a duna e hobennan cu ta bira Polis ta pa siña e bon nan di e superiornan y cana e caminda straight y pa semper ta integro.

 

Caroline Peterson a cuminsa traha cu Gobierno na 1992 na e Gezondheidsdienst. Aki el a traha 4 aña den e departamento di Ziektenkosten. Despues el a bay traha na Cuerpo Policial Aruba den departamento di administracion. Caroline Peterson a solicita pa bira secretaria di Comisario di Polis cu tabata bou mando e tempo ey di Hugo Kock. El a traha cu Hugo Kock te dia cu el a baha cu pensioen, despues cu Jan van der Straten y a sigui traha cu Dolfi Richardson ora e tabata comisario y te dia cu el a bira Korpschef. “Ami mes a opta pa no bay over como su secretaria. Mi a keda como secretaria di Comisario y mi a bay traha cu Trudy Hassell”, Carolina Peterson a expresa.

 

Caroline Peterson a haya oportunidad pa bira “Recherche Assistent” pero e mester a sigui un opleiding. Awo Caroline Peterson ta un “buitengewoon agent van politie” y ta traha den e departamento di Recherche. “Tur cos ta positivo. Mi tin hopi di gradici na nan, pasobra tur oportunidad cu mi a haya, curso, lezing, opleiding, mi a siña masha hopi den Polis”, Caroline Peterson a expresa orguyosamente.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio