ORANJESTAD – Tecnologia ta un aspecto cu no por wordo separa mas for di enseñansa. Pa algun tempo caba paisnan innovativo a incorpora esaki den e base di nan sistema, ya cu enseñansa ta un di e pilarnan pa cualkier pais por progresa. Den Reino Hulandes nos por nota cu Corsou tambe ta den full swing cu digitalisacion. Na Hulanda tambe a crea espacio pa den e curriculum por tin ‘programmeren & multimedia’ pa scolnan primario. Lastimamente na Aruba nos no tin un plan cu ta stipula ki direccion mester bay cu e mundo di enseñansa, mucho menos con lo incorpora tecnologia den esaki.
Pakico Tecnologia?
Mirando e manera cu tecnologia a manifesta su mes den e ultimo añanan, nos por conclui cu esaki ta casi inseparabel di un comunidad moderno. Tecnologia ta ser uza den casi tur hogar, den nos forsa laboral y lastimamente e no tin mesun representacion den nos enseñansa actual na Aruba. Ta premira cu e uzo di tecnologia, den un mundo na unda tur e generacionnan den nos comunidad a wordo expone na tecnologia, lo sigui crece mundialmente den enseñansa den e añanan binidero. E ta un hecho cu nos maestronan ta sinti e necesidad di tecnologia pa asina enrikece e klas. Como un docente mi mes y tambe den combersacion cu otro coleganan, bo ta mira tecnologia manera un factor importante pa mehora e calidad di enseñansa.
Den mundo di enseñansa, tecnologia ta expande e oportunidad di siña y ta haci’e uno accesibel pa por participa. Rapportnan a demostra cu e uzo di tecnologia den klas ta motiva e studiantenan mas, cu ta resulta den un miho logro na scol y cu nan lo siña mas lihe. Tambe nos por mira cu e uzo di tecnologia ta haci’e posibel pa monitoria e progreso di un mucha di nos studiantenan ‘real time’ (na mesun momento cu e ta pasando). Tecnologia por percura pa nos enseñansa ta uno mes dinamico cu e mundo cu nos ta bibando aden.
Rekisitonan
Pa innovacion por tuma luga den nos enseñansa nos tin cu revisa e leynan vigente pa por haci espacio pa un curriculum adecua pa e uzo di tecnologia den klas. Un di e rekisitonan pa e uzo optimal di tecnologia ta keda e accesibilidad di Internet den tur klas, sea e ta pa e leerlingvolgsysteem of pa por duna cualkier forma di les digital (digiboard, beamer, smartTV, etc). Pues ta yega momento cu nos tin cu deshaci di e borchinan di krijt pa traha espacio pa tecnologia. Tambe nos tin cu percura pa duna nos enseñansa e material necesario den un forma digital (aki nos por pensa riba un portal digital) cu ta rekeri pa facilita nos maestronan den nan trabou.
Mirando cu e introduccion di tecnologia lo trece cu ne ekipo di balor den klas, cu lo haci’e un target pa ladronicia, nos tin cu percura tambe pa e siguridad na scol. Tur scol na Aruba mester tin un bon sistema di alarma y camara di siguridad prome cu nan kier cuminsa haci uzo di tecnologia na scol. Tambe nos tin cu tene cuenta cu tecnologia den klas ta rekeri mantencion. Den pasado a introduci computer na scol sin tin un vision adecua. A instala computer y a laga nan pa nan cuenta. Tecnologia na cualkier scol ta bay man den man cu e mantencion cu ta cay bou di e responsabilidad di un asina yama coordinador di ICT. Nos enseñansa ta rekeri un vision amplio riba e uzo di tecnologia cu un necesidad pa mas training den e ramo aki.
Plan 2035
Na e momento aki, mundo di enseñansa ta nabegando manera un barco sin rumbo. Lastimamente e cartera di enseñansa a wordo maneha den e ultimo añanan pa personanan cu a haci locual nan tabata por den nan capacidad, pero nan no ta bin di e mundo di educacion. No tin un vision ni tampoco mision pa pone un bista di kico y con nos enseñansa lo ta, specialmente cu tur e cambionan cu ta tumando luga mundialmente. Pa e motibo aki, den cooperacion cu mas maestro y partnernan den mundo tecnologico y sector priva, mi ta preparando un plan pa wordo inicia na 2020, cu un trayectoria di 15 aña. E plan aki ta encera entre otro e incorporacion di tecnologia y sostenibilidad di esaki. Mas importante cu tur, e plan ta encera un sistema di enseñansa adaptivo, uzando entre otro e metodo di Montessori.
Nos comunidad tin un mix di generacion y e mester tin un espacio pa tur di nan. Mientras nos ta prepara pa cuida e generacion di babyboomers, mester habri porta pa millennials y generacion Z pero mas cu tur, traha e fundeshi pa generacion Alpha cu lo ta e weso di lomba di nos economia aki 20 aña.