ORANJESTAD, Aruba: Diaranson Ministerio di Turismo a presenta e prome cifranan di e prome mita di aña 2017. Minister di Turismo, Transporte Publico, Energia y Medio Ambiente, Ing. Mike de Meza ta haya cu e cifranan ta uno sumamente positivo y tin un caida den dje cu ta e bishitantenan di Venezuela. Haciendo un comparacion cu aña pasa e bishitantenan di Venezuela a cay cu 70%, pero esaki tin di haber cu tur e retonan cu tin na Venezuela.
Den e otro mercadonan por mira cu nan a aumenta den e cantidad di turismo cu ta bin Aruba y esaki ta algo positivo. Esaki ta conta pe parti di Noord America cu ta Estados Unidos y Canada, cu a aumenta den forma significante, e parti di Europa tambe tabatin un aumento basta grandi for di Hulanda, Inglatera, Alemania. Tambe tin e parti di Sur America cu a aumenta, specificamente e 2 paisnan cu ta Argentina y Peru. Argentina tin un aumento di mas cu 50%, mientras cu Peru a aumenta cu 40% y esaki ta sumamente positivo. E cantidad di turismo di Venezuela a cay y compara cu aña pasa esaki ta un averahe di 70%. Esaki ta un caida basta grandi, sabiendo cu Venezuela semper tabata e di dos mercado di mas grandi di Aruba.
Pero desde 2015 pa 2016 un cantidad sumamente grandi a bin di Venezuela, cual ta un cifra cu ta core den 130 – 150 mil persona cu tabata bin como turista. Minister de Meza a expresa cu awo por mira cu e cifra di turista Venezolano ta uno bastante abou. E 70% di esaki a cay afo pero e “occupancy rate Aruba” di e prome 6 luna ta esun di mas halto den Caribe y e Refpar tambe. Por mira cu e revenue per available room ta esun di mas halto tambe den Caribe ora ta papia di aumento. Ora di papia di cifranan absoluto, tin e competencianan manera di Turks & Caicos, Barbados cu tambe ta haciendo bon den e cifranan halto, pero loke ta trata aumento e track ta mustra cu Aruba ta mas halto.
Tin biaha ta dificil pa haci un comparacion den cantidad absoluto, pasobra e inventario cu tin na paisnan grandi ta superior cu esunnan cu tin localmente. Pero den e crecemento por mira kico Aruba ta para pe, tin un aumento significante. Den e turismo crucero tambe tin un aumento significante pe aña aki y si cosnan sigui den e forma ey, Aruba lo kibra un record pa prome biaha den historia unda cu lo surpasa 7 mil turista cu ta bin via e barconan crucero. “Esaki ta algo sumamente positivo. Aworaki caba nos por mira un aumento di 15.5% pe parti ey cu ta hopi importante”, Minister de Meza a expresa.
E cifranan di “occupancy” ta sumamente bon riba e Refpar, di cual e crecemento ta sumamente bon. Si saca Venezuela afo, por mira un crecemento di 7.6% mientras cu si pone Venezuela den dje ta mustra cu el a cay cu un porcentahe di 8.7%. Esey ta e parti di Venezuela cu a dip e cifranan en total. Ministerio di Turismo ta sumamente contento cu turismo ta bayendo bon, cu ATA ta haciendo un tremendo trabou hunto cu otro partnernan di strategia manera AHATA, ATIA y tur den sector hotelero y restaurant.
“Ta asina aki nos tin cu traha pa nos pilar economico, cu nos tur ta mira den mesun direccion”, Minister de Meza a expresa. Pa ta importante pa duna expertonan riba e tereno aki e espacio pa nan traha, espacio pa asina nan por bin cu ideanan, espacio pa negocia cu aerolineanan.
Minister de Meza mes ta sinta y participa den diferente negociacion cu diferente grupo. Tur esaki ta pasa riba e manera cu Minister de Meza ta duna e profesionalnan manera ATA y AHATA espacio pa traha hunto. Esaki ta pa asina nan por haya e libertad pa mira cua ta e mercadonan cu nan mester target y traha agresivamente riba dje. E resultado lo ta bon si duna e expertonan e espacio necesario. “Mi no mester tin e necesidad di purba micro management, pasobra asina aki bo ta limita experencia di esunnan cu ta traha mas den e ramo aki”, Minister de Meza a remarca. E mandatario di turismo ta duna e expertonan e espacio pa asina na final di dia e resultadonan ta papia pa nan mes.