Home » Jacky van Putten, POR Elimina politica for di comision di subsidio y deporte

Jacky van Putten, POR Elimina politica for di comision di subsidio y deporte

by sxm
0 comment 66 views

Diadomingo nos tur por a tuma nota di un team di hobennan para na diferente skina pa asina nan recauda fondo pa nan por hunga baseball afo. Hopi ta e comentario fuerte contra gobierno pa cu esaki. Te hasta politiconan a mustra nan descontento. Mi inbox a yena cu preguntanan tocante di e subsidio of con esaki ta hinca den otro? Dialuna minister di deporte a contesta e inkietud aki y a basa su mes cu tin reglanan stipula pa asina bo organisacion por bin na remarca pa un subsidio.

Den e preguntanan  mi por a ripara  cu tin un falta di informacion riba con bo por bin na remarca pa un subsidio. Hopi clubnan no ta prepara debido of no tin e capacidad pa pone un peticion den otro cu e consecuencia cu nan nunca ta yega na remarca. Minister di Deporte a reorganisa e subsidie commissie y a hacie un entidad huridico entante 1 di  januari 2018.  Lo ta bon e ora pa haci un campaña di consientisacion pa tur e clubnan deportivo pa nan por wordo educa  con nan mester prepara nan programanan y asina nan tambe por bin na remarke pa haya subsidio. Minister ta anuncia cu e meta principal ta pa saca politica for di subsidio, cu otro palabra si bo ta friends and family of bo kier un fabor a cambio di politica e lo no por mas. Esaki ta di aplaudi pasobra pa añanan esaki ta e situacion y pesey e fondo ta sufri asina y e placa no ta yega na esnan cu mas mester di dje, e deportista.

Lo ta bon tambe cu ora nombra e presidente di subsidio percura cu politica tambe ta for di dje. Mester tin transparencia den esaki, cu solicitud habri y rekisitonan conoci pa tur hende.  Tur posicion den e directiva nobo aki mester bin independiente y solicitutnan claro pa mañan e no  bira algo cu bo ta pone bo hendenan prome cu bo bay. E malesa cronico cu a caba cu deporte aki na Aruba.  Tanto bal bo tira awa limpi den un bari sushi! Si politica mester keda afo di subsidie commissie anto integrantenan di dje tambe mester pasa den un screaning y no wordo apunta!!!

Si nos wak den pasado (y no, e no ta politica bieu di critica) subsidie commissie a otroga desde 2001 te cu 2009 diferente placanan na organisacionnan  priva y desde 2009 pa 2017 esaki a wordo para. Si nos pasa den nan por wak cu diferente sumanan a wordo duna, uno mas cu otro. Mi pregunta ta ki critierio a wordo usa pa esaki, desde 2009 tur e subsidio na instancianan priva a stop door di e gobierno actual. Nos sa cu e fondonan genera pa Lotto pa Deporte ta destina pa deporte y cultura  y esaki mester wordo bon maneha.  No tin transparencia den e subsidio, federacionnan cu poco miembro of cu atletanan limita den nan resultado ta gosa di apoyo mientras federacionnan cu tin hopi deportista no ta haya nan fair share. Politica semper a dicta den deporte. Djies mira ora gobierno cambia.

Sin duda no por tin un free for all, mester  tin regla y nan mester ta transparente pa tur hende pa asina tur tin e mesun oportunidad pa haya un subsidio.  Federacionnan tambe mester haci nan parti door di cumpli na tempo cu tur e rekisitonan pa asina un comision di subsidio por evalua neutralmente e necesidad di cada un y percura cu tur rekisito a wordo cumpli. Mester educa cada federacion con pa traha nan peticion y bukinan mester keda habri pa tur mira ken a haya y kico nan a haya y cuantonan  nan a haya. Transperencia no mester ta un slogan politico sino un hecho, sino nos deporte lo nunca florece manera e mester ta.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio