POR ta para pa introduccion di organonan cu ta yuda controla Parlamento y ehecucion di gobierno
Diahuebs anochi a tuma luga e debate pa Millennials den Cas di Cultura pa cual lider di POR Otmar Oduber kier a duna palabranan di pabien na organisadornan y tambe na tur cu a participa pa por duna informacion na e grupo di hobennan. Un grupo sumamente importante, un grupo cu ta critico y cu kier pa manera e cos ta e wordo bisa. E grupo aki contrario na generacionnan anterior ta esun cu lo fiha e caracter di eleccion venidero.
Actualmente tin mas di 20 mil Millennial na Aruba y e biaha aki e grupo aki lo ta esun cu lo influencia esunnan di generacionnan mas grandi, contrario na antes unda cu e grandinan ta influencia e generacion aki. E generacion aki kier participacion, nan kier mira cosnan positivo, nan kier mira cu tin trabou mayan, nan kier mira e parti progresista di e Pais, nan kier mira e parti pragmatico cu bo ta atende problemanan cu ne y ta pesey Partido POR E Forsa Nobo a wordo funda y tey awe pa sirbi comunidad di Aruba.
Durante di e prome tanda di e debate e topiconan cu a bin dilanti ta finanzas publico, educacion y criminalidad. Si enfoca unrato riba finanzas publico, Millennials ta considera e topico di debe nacional como uno sumamente importante, segun fondo monetario (IMF) un Pais ta sostenibel si ta premira cu e “debt to GDP ratio” ta keda na un nivel abou of a lo menos ta baha na un nivel acceptabel den termino largo. Ta conoci cu nos debe nacional actualmente ta na 86% di nos GDP segun fuente CAFT. Cada lider a wordo puntra si nan ta considera esaki sostenibel y kico lo haci pa mantene finanzas publico sostenibel den un periodo rasonabel (4 aña).
Sr. Oduber a splica cu finanzas publico ta un problema serio y awe practicamente 10 siman for di eleccion, coreccion di e problema aki ta cuminsa cu e eleccion cu nos ta bay tin pa bin cu un Parlamento integro cu ta controla y haci e trabou berdadero pa un gobierno no sigui hinca e Pais den mas debe, esey ta na prome luga. Na di dos luga nos tincu percura pa bo tin bo organonan y institucionnan (Algemene rekenkammer, Centrale Accountantsdienst (CAD) etc.) ekipa cu personal y materialnan necesario, pasobra nan ta mantene e Ministernan den liña corecto y recto, esaki ta algo cu no tey actualmente y mester percura pa e wordo reinstitui. Lider di POR a sigui splica cu na di tres luga mester percura pa nos finanzas publico no solamente wordo reenforsa a traves di e diferente institutonan, pero percura tambe cu tin organonan cu ta yuda controla Parlamento y ehecucion di gobierno. Ora cu nos logra esey, nos mester traha hunto cu esey pa logra un economia fuerte. Reduci gasto di gobierno entre 20% cu 22% den e prome 4 añanan aki. Percura pa bo privatisa y independisa un cantidad di servicionnan cu no ta di gobierno y hunto cu esaki percura cu bo ta bay cu un reforma fiscal caminda cu bo ta bay di belasting directo pa indirecto unda cu bo ta incentiva companianan existente.