Como politico nobo bo no tin idea loke bo lo confronta ora bo sali den pueblo bishita cas y comparti e plan cu bo partido tin pa siguiente gobernacion. Tumando e curashi pa drenta e arena politico bo ta expone bo mes y bo famia te hasta bo futuro. Pero si nos stima nos pais y nos kier mire progresa, ta importante cu nos no solamente para na banda y critica pero tin e balentia di tuma e reto.
Como nobato bo no sa kico pa spera, e ta exigi hopi tempo y energia mental. Bo mester ta den pueblo y scucha kico nan dolor y deseonan ta y asina formula un maneho cu lo por alivia esaki y trece seguridad y salud entre otro pa nos hendenan. Bishitando casnan den diferente bario bo ta tende y sinti loke ta biba den nos pueblo. Loke a resalta hopi ta con nos hendenan kier nos pais y kier mira e mihor gobierno sinta. Nan ta consiente di e situacion actual y kico mester wordo haci pa cu e futuro. Tambe mi por a experiensa un politica di antaño na unda e pueblo ta wordo acerca cu promesanan bashi a cambio di nan voto. Hopi ta e casnan cu mi a drenta y directamente mi ta wordo puntra of miho bisa si bo duna mi un trabou, subi mi onderstand, duna mi un cas, paga mi utilidadnan mi lo duna bo mi voto. Mi a bin compronde cu durante campaña tur cos ta wordo priminti pa por haya bo voto.
Como un persona cu nunca tabata un politico e ta impactami mirando con nos pueblo ta wordo manipula pa un voto. E bienestar general no ta importante, e poder di goberna ta prome. Un otro aspecto cu mi a ripara cu hopi hende tin miedo di expresa pensando riba e represalia cu por bin. Mi a evita casnan cu bandera di otro partido y a concentra riba esnan cu no tin. Varios ta biba cu temor real cu loke e gobierno a duna nan (esey nan ta pensa mientras cu ta deber di gobierno) cu e lo wordo kita. Nan a perde nan voz pa miedo.
Cu pasenshi, scuchandonan y comprondiendo nan puntonan di bista, mi a conclui cu e precupacionnan di mas grandi ta:
- Nan no ta sinti nan mes mas sigur y ta pensa cu cualkier momento lo por presenta antisocialnan cu lo por atracanan of pone nan bida na peliger
- Bida a bira hopi caro, e placa no ta yega pa nan canasta basico, cada bes awa, coriente , belasting ta subi y tur sorto di medida cu nan no por wanta cabes riba awa
- E cuido medico tin nan hopi precupa, specialmente esnan di mas edad. Antes nan por a yega na nan docter sin problema. Awo e ta un caminda di cruz y pa un specialista ta dura lunanan
- Tin cu ta wardando mas cu 10 aña sin tende nada y mas cu tur ta mira terenonan wordo regala na otronan pa haci negoshi
- Nan yiunan cu caba cualkier scol ta pasa masha duro pa haya trabou.
- Deporte y recreacion. Specialmente despues di scol. Nan barionan no ta ofrece nada pa nan yiunan y mayoria di mayornan ta traha y e hobennan aki ta keda sin supervisionm y no tin actividadnan sen nan bario pa por mantenanan ocupa.
Mi pregunta ta si e precupacionnan aki ta biba den e pueblo, kico e gobierno aki a haci. Tin critica riba nos seguridad. Polisnan no ta contento, no tin material di trabou, nan ta understaffed y overworked.
Pa por cumpli cu e prestamonan barbaro pa infrastructura a sacrifica e poder di compra door di impone impuestonan halto. Despues di 18 aña di introduccion di AZV a bira tempo pa evalua esaki di cerca. Ta comprendible cu no tin fondonan ilimita, pero si esun cu ta paga pe (e pagado di belasting) ta sinti cu e no ta haya e cuido cu e merece anto ta tempo pa evaluacion di e sistema.
Mamanan soltero, famian di menos recurso ta sclama pa un vivienda y ta warda tanto aña, sabiendo cu gobierno su responsabilidad pa ley ta percura pa 800 cas. ( 8 biaha 800 = 6400) unda nan a keda? Cu escandalo rond di permiso na unda trabounan di yiu di tera ta wordo otroga pa medio di ontheffing. Nos por compronde e dificultad. Por ultimo 8 aña nada, pero nada a wordo haci cu e facilidadnan deportivo of programanan den bario.
Plataforma nobo POR a mira e necesidad di pueblo y lo ta e cambio. E cultura di dunami pami vota, e cultura di miedo pa represaya mester transforma den corage pa un rumbo nobo pa nos pais. Bo lo tin e oportunidad pa ta e causa di e cambio. 22 di september ta e fecha.