92
ORANJESTAD — E debate di millennials siman pasa diahuebs tabata un exito grandi. E set up tabata hopi profesional y e preparacion tambe. E preguntanan tabata mas al caso, y talves cu excepcion di e preguntanan SI of NO, tur cos tabata bon prepara.
Den e preguntanan Si of NO tabata tin algun cu ta demsiado importante pa djis contesta SI of NO, y cu mester di splicacion. Pero por lo general un debate hopi profesional y bon hinca den otro.
Di e debate aki un biaha mas lider di MEP Evelyn Wever-Croes a sali e ganador absoluto. Sea cu bo ta di acuerdo of no cu tur su contestanan, locual a resalta serca tur hende ta cu Evelyn ta un lider bon prepara pa lidera nos pais. Evelyn ta contesta tur pregunta, ni con dificil nan ta. Evelyn ta sincero den su contestacion, maske e sa cu e lo no haya aprobacion. Eseynan ta caracteristicanan cu nos ta busca den un lider.
LIDER DI MEP TA BON PREPARA Y A CONTESTA TUR PREGUNTA
No tin ni un pregunta cu e no a contesta, y el’a tuma su tempo pa splica e vision di MEP den e poco tempo cu a ser duna na nan. Su contestanan tabata directo y al caso, y realistico. Kiermen bo ta mira cu ta un persona cu un bon estudio, cu hopi experiencia di trabou y cu a studia e problemanan di nos pais pa asina presenta solucionnan realistico.
LIDER DI MEP A DEMOSTRA TRANKILIDAD Y CARISMA
Ningun momento el’a baha di nivel of perde tempo pa ataca otronan. Ni tampoco perde tempo di bai den pasado pa defende cualquier maneho di pasao. Lider di MEP a keda mira e presente y e futuro, papiando di e problemanan mas serio den nos comunidad, y mesora duna solucionnan realistico.
Tin algun persona cu no tabata di acuerdo cu tur tur e contestanan di lider di MEP, pero asina mes ta di opinion cu e ta e mihor persona pa lidera nos pais y saca nos pais di e abismo cu AVP tin nos aden.