Cuanto tristesa, lagrima, dolor y lamento ocasiona door di e tragedia na Boegoeroei. Tanto e famianan como comunidad henter ta den shock y ta purba di compronde con algo asina por a pasa. Pakico. Tur hende ta buscando contesta riba e pregunta aki.
Dos bida a bai perdi y un di tres bida a wordo destrui. E polis cu a tira, ta victima tambe. E ta bai keda cu trauma pa resto di su bida.
E polis cu a fayece di forma hopi cruel ta ser considera un heroe y e ta un heroe. Pasobra como polis ela duna su bida cumpliendo cu su trabow di duna proteccion na pueblo y di combati agresion y criminalidad. Un trabow cu ela haci cu hopi orguyo y curashi sin spera cu e lo a bira e prome polis na Aruba cu ta fayece cumpliendo cu su funcion di polis.
E agresor ta ser considera un criminal y e NO ta. E ta victima di su malesa mental. Un ser humano cu pa hopi aña caba tabata sufriendo door di su malesa. Un malesa cu a hib’e na episodionan di psychose cu e no tabata tin gara riba nan.
E polis cu a tira ta ser considera e autor cu a actua robes. Pero e NO a actua robes, ela actua den desesperacion pa yuda su colega. E ta victima di e falta di preparacion y e training inadecuado cu ela haya mescos cu su colega cu a fayece.
Tur pais tin su pashentnan psikiatrico. Y tin un teoria cu ta plantea cu hende por midi con educa un pais ta na e forma cu su ciudadanonan ta trata animalnan. Imaginabo. E no ta un teoria malo pero no full na su luga. No ta mucho mas adecuado pa bisa cu un pais ta wordo considera civilisa segun e forma cu su gobierno ta trata pashentnan psikiatrico y adictonan?
Na Aruba tin ley pa proteccion di cacho y no tin ley pa proteha hendenan margina. Hende cu ta sufri na man di malesanan mental. Hopi ta cana rond riba nos isla, lubida y repudia.
Mi a lesa un comentario no mucho tempo pasa cu ta bisa asina’ki: si ami mira un hende tira riba caya sangrando, mesora mi ta yama “911”. Si riba e mesun caya mi mira un persona tira ey bow cu ta sufri di un malesa mental casi sigur mi lo cuminsa cana mas liher lagando e persona pa su cuenta. Como comunidad den su totalidad nos ta haci mesun cos. Nos ta sera wowo y mayoria bes nos ta laga e problema den man di polis pa nan deal cun’e. Cuanto biaha pashentnan psikiatrico no ta end up tras di trali? Prison no ta un setting adecuado pa trata hende cu malesa mental serio. Tur hende mester ta di acuerdo cu esey. Lo ta mas humano pa hueznan comisario tuma e salud mental di e persona di biaha den consideracion y mand’e PAAZ.
E falta enorme di cuido y institutonan adecuado pa pashentnan psikiatrico a haya masha poco atencion di gobierno (nan).
Nos cuerpo policial ta man yen. Pueblo tin e impresion cu ni alto mando policial ni minister di husticia y tampoco minister di salubridad publico a sinta hunto y kibra cabes riba e problema urgente aki pa yega na solucionnan. Tin un rapport di Committee for the Prevention of Torture and Inhuman or Degrading Treatment or Punishment (CPT) di 2014 cu a duna un bista di e situacion pesimo den KIA di e IBA (Individuele Behandeling Afdeling) caminda ta duna trato psikologico y psikiatrico minimal na presonan cu problema mental. E celnan ta den situacion deplorabel y e presonan ta ser laga pa nan cuenta sin ningun plan di tratamento pa nan estado mental.
Ta hustamente e falta di un maneho adecuado pa zorg pa tin institutonan profesional pa cuido mental ta na fondo di e sosedido na Boegoeroei. Pues si gobiernonan a hiba un maneho adecuado y si alto mando policial a zorg pa un nivel adecuado di training di agentenan policial y si ministernan di husticia y di salubridad a tuma nan responsabilidad na serio, e tragedia no mester a pasa. Nos a yega di puntra nos mes ta cuanto hende cu malesa mental serio tin den nos comunidad y cuanto cama tin disponibel pa nan na PAAZ? No a bira critico pa actua mas humano y bin cu opcionnan humano pa nos pashentnan psychiatrico?