Recientemente nos por a scucha director di Saba Sr. Kock ta vocifera su precupacion pa cu cuido di nos ciudadanonan di edad halto. Sr Kock a trece dilanti cu dentro di 20 aña cu di cada 3 persona di edad halto un lo tin problema cu demencia of alzeimer. E facilidnan cu tin na e momento aki no ta suficiente awe corda aki algun aña ora nos mester acomoda hopi mas. E alarma a wordo bati, kico nos gobernantenan ta bay haci? E situacion aki mester ta prioridad den cualkier gobierno y mester ta halto riba e programacion di maneho. POR a ancra esaki como prioridad den su maneho.
-Deporte recreativo: punto di salida ta cu facilidadnan deportivo mester ta situa mas tanto posibel den e bario unda e usuario ta biba. Pa tal motibo lo duna atencion na desaroyo y mantencion di facilidadnan den tur bario y districto.
-Pa desaroyo di deporte ta necesario pa inverti den facilidadnan y ekiponan deportivo moderno mantencion continuo. Mirando cu deporte mester ta accesibel pa tur hende, lo percura tambe pa facilidadnan y guia pa gruponan special (60-plussers y personanan cu impedimento fisico y/of mental).
-Percura pa desaroyo di proyectonan di residencia social di diferente categoria y di piso, incluyendo area di recreacion y parke di naturalesa pa asina contribui na calidad di bida di e ciudadano. Mester evita pa concentra residencianan social den mesun area of bario.
-Reforsa e posicion di centro di barionan como pilar di convivencia dentro di nos comunidad y conscientisa nos comunidad di e importancia di esaki.
Tin hopi estudionan haci na unda a demostra cu movecion y interaccion cu personanan den estado di demencia y alzeimer ta di beneficio. Mi persona tambe tabatin e oportunidad pa envolvi e grandinan den movecion y recreacion. E resultadonan tabata hopi positivo yen animo, calidad di bida di nos ciudadanonan di edad tabata halto. E programa di POR lo bay percura cu nos grandinan den tur bario lo tin e facilidad y posibilidad cu guia profesional pa asina mantene y promove nan salud cerca di cas. Nos mester brinda un solucion preventivo pa cu nan salud. IDEFRE a wordo cambia pa IBISA pa inclui salud y pa 8 aña ta traha riba manehonan riba papel pero nada di ehecucion. Awo falta menos cu 3 luna pa eleccion lo bay bin cu ne?
POR ta comprometi cu nos grandinan pa provee un mihor calidad di bida. Mester cuminsa di inmediato cu programanan y percura cu e centronan den bario ta renova y adecua pa asina nan por wordo uza optimaalmente. Lo prepara profesionalnan y voluntarionan cu e conocemento pa asina implementa un programa structura den tur centro di bario pa nos grandinan cu of sin limitacion. Salud y bienestar di nos grandinan ta prioridad di e Plataforma nobo, POR.