Home Uncategorized Homber bou influencia ta keda deteni pa motibo di ta toca musica...

Homber bou influencia ta keda deteni pa motibo di ta toca musica hopi duro, den oranan di marduga, strobando su bisiñanan

SHARE
Diadomingo entre 3’or y 3’or y mey di marduga, na Savaneta polis ta detene un homber di inicial MK, pa motibo cu e tabata bou influencia y den e oranan di marduga tabata toca musica duro, strobando su bisiñanan di drumi.
 
Pa mas o menos 3’or di marduga, un patruya a bay na e adres pariba di Centro di Bario Jaraweg, pa motibo cu e homber MK, tabata basta bou influencia y tabata toca musica asina duro cu mayoria di su bisiñanan no por a drumi trankil.
 
Na yegada polis a scucha enberdad cu e musica tabata hopi duro, pero mesora a nota cu e musica a wordo baha. Nan a topa cu MK, pata pata, cu lenga pisa y di baina por a para riba su pianan. Polis a avis’e pa e no toca duro stroba su bisiñanan di drumi, segun MK e ta bezig ta chill y cu e sa cua bisiña lo a yama polis pe. Tambe polis a mustre riba e consecuencianan si e bolbe hisa e volume.
 
Un rato despues cu polis a bandona e cas di MK, nan a wordo pidi pa bay bek na e cas pa motibo cu MK a bay molestia su bisiñanan y a papia palabranan insulente cu nan. Na e sitio enberdad polis ta scucha e musica hopi duro bek. 
Mk a sali for di su cas cu un actitud basta agresivo, ela cuminsa grita cu e no a haci nada y puntrando kiko ta polis su problema, e la keda papia y bira mas agresivo. E agentenan na e sitio a pidi MK pa calma pero e no tabata compronde y tabata keda grita.  
 
No a keda e agentenan nada otro cu pa su seguridad y di otronan, di bay over na detene, esaki no a bay facil mirando cu MK tabata hopi intrankil y tabata lucha bek cu e agentenan, despues di un poco lucha a logra domina MK y a bisti’e e boeinan.
 
Despues cu e polisnan a logra detene MK, transportwagen di polis a transport’e pa warda di polis na San Nicolas, caminda e lo haya un cuarto cu e por calma, mientras e agentenan policial ta haci mas investigacion.