ORANJESTAD, Aruba: Post Aruba N.V. a celebra e di 35 aniversario di Donald Dijkhoff, kende a drenta den servicio di Post Aruba N.V. dia 6 di Mei 1982. Donald Dijkhoff a cuminsa como un ayudante di partido di carta y awendia su funcion ta magazijnmeester den departamento di financia.
Donald Dijkhoff a celebra su aniversario hunto cu su coleganan pero tambe cu su esposa, kende ta orguyoso di dje. Donald Dijkhoff ta un persona cu a crece den Post Aruba N.V. unda cu el a traha den mayoria departamento cu ta relaciona cu operations. Donald Dijkhoff a traha como ayudante, all around den Express Mail Service, expediteur, trahado di siguridad di Post/coordinador di mail, hoofd brievenbesteller y awo e ta magazijnmeester den departamento di financia.
Donald Dijkhoff ta un persona cu semper tin un bon humor y semper e ta haci joke. Tambe e gusta canta y di leu por scucha Donald Dijkhoff ta canta den gang. E ta un bon colega y por conta riba Donald Dijkhoff. Semper e ta cla pa yuda.
Hunto cu su famia y colega, Post Aruba N.V. a duna Donald Dijkhoff un gradicimento pa su esfuersonan haci tur e añanan aki.