Home » Directora di YMCA, Rachel Croes YMCA tin vacaturanan habri pa full time y part time

Directora di YMCA, Rachel Croes YMCA tin vacaturanan habri pa full time y part time

by sxm
0 comment 93 views

Ta buscando personanan cu hopi gana pa traha cu mucha y hobennan

 

ORANJESTAD, Aruba: Na YMCA Dakota y San Nicolas na e momentonan aki tin funcionnan habri. E funcionnan habri cu nan tin ta Youth Worker cual ta funcion di part time y full time. Directora di YMCA, Rachel Croes, a splica cu nan ta buscando personanan hoben cu hopi energia cu tin e gana di traha cu mucha y hobennan cu un edad di 4 aña te cu 17 aña.

 

Nos tin 2 funcion habri na YMCA Dakota y 1 na YMCA San Nicolas pa Youth worker. Un otro funcion habri ta pa Intern Beleids medewerker”, Rachel Croes a indica. E funcion aki e persona lo traha tanto na YMCA Dakota como YMCA San Nicolas. Esaki ta pone cu e Youth Worker lo tin un luga vast, pero e Intern Beleids medewerker lo mester tin rijbewijs y auto propio pa asina e por move entre e dos luganan di YMCA.

 

Pa e posicion di Youth worker, e persona su trabou lo ta crea relacion positivo cu mucha- y hobennan cu ta bay YMCA. Tambe e persona lo ta encarga pa duna guia di e huiswerknan di e mucha- y hobennan, desaroyo y lo ehecuta actividadnan paden y pafo pe programanan di Y’s Care y hobennan. Un otro parti di e trabou ta cu e persona lo yuda desaroya y asisti cu tur programa y camp di YMCA. Y e persona lo atende cu tur su responsabilidad den un manera mas efectivamente. YMCA ta ofrece un trabou varia y cu retonan, e persona ta haya experiencia den un organisacion internacional y trahando na YMCA ta duna e oportunidad di sirbi na e comunidad di Aruba.

 

Pa loke ta e posicion di Intern Beleids medewerker, e persona lo ta responsabel pe desaroyo y implementacion di e polisa di strategia. Como e Intern Beleids medewerker e persona lo ta responsabel pa ehecuta e standard halto di YMCA su polisa y programa door di desaroya, coordina, implementa y ehecuta programa di actividadnan di Y’s Care y Y’s Teen y tur otro programa pa asina sigura e siguridad y desaroya un medio ambiente apropia pa tur participante. Tambe e persona lo guia y sigura e profesionalismo di e youth workers.

 

YMCA Aruba ta haci un peticion na tur persona cu ta energetico, cu ta tuma iniciativa, cu ta un ejempel pa nos hubentud y cu tin un edad entre 19 pa 30 aña, pa pa aplica prome cu diabierna 9 di Juni 2017. Pa aplica mester e-mail un carta di aplicacion y Curriculum Vitae (CV) na [email protected]. Pa mas informacion riba e vacaturanan por tuma contacto cu e personal di YMCA na 5823072 (Dakota) of 5845303 (San Nicolas).

 

Young Men’s Christian Association (YMCA) ta funda dia 6 di juni 1844 dor di George Williams na London, Inglatera. Su oficina principal ta na Geneve, na Suisa. Mas di 57 miyon hende ta beneficia di e asociacion estableci den 125 pais rond mundo. E lema principal di e organisacion internacional ta empodera hendenan hoben.

 

 

 

 

 

Bob Steele a funda YMCA Aruba 61 aña pasa door di e necesidad pa bin cu un luga pa hobennan pa evita cu nan lo ta riba caya. YMCA tin como meta pa crea personanan util y habil den nos comunidad pa medio di brinda guia y motivacion, pa asina nan ta un influencia positivo ariba nan contemporaneonan.

 

YMCA ta ofrece diferente actividadnan manera campamento pa mucha, campamento pa hoben, recreacion deportivo manera p.e. volleyball y basketball y otro deporte, como tambe eventonan social. YMCA a cuminsa cu e prome “Tra’i merdia”, yama Y’s Care (YMCA Care) cu a cuminsa na Aruba 27 aña pasa cu un programa di asistencia cu huiswerk y recreo.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio